Ka lawei ki seng riewlum kan long kaba eh bha lada kam don ka rukom pyrkhat kum ki por ba la leit: Bindo

Shillong, Lber 15: U Nongaibuit ka United Democratic Party (UDP) u Bah Bindo M Lanong uba long ruh uwei na ki riewsaiñ pyrthei uba la ih bha ka rta u la ong ba ka lawei ki seng riewlum kaba ap ïa ki ka long kaba i shitom bha ba kin kiew hynrei kin sah kumjuh ne hiar syndon ruh namar ka jingbym don ka rukom pyrkhat kaba beit bad kaba shongkun kum ki nongïalam kiba ha ki por ba mynshuwa.
Haba kren sha ki lad pathai khubor u Bah Bindo u la ong ba ki seng riewlum kiba mynta ki la hiar shaba palat namar ym don shuh hi ruh ki nongïalam kiba kynsai kum ha ki por kiba mynshuwa kiba don ka jingsngewthuh bad ka jingpyrkhat kaba kynsai na bynta ba shakri ïa ka jylla.
“Ka jinghiar ki seng riewlum ha ka jylla ka dei beit namar kim shuh ki nongïalam kiba kynsai kum ki jong u Bah BB Lyngdoh, Bah SD Nicholroy, Bah Hopingstone Lyngdoh kiba don ka jingpyrkhat kaba shai bad kiba da long shisha ki rangbah ym kum kine ki nongïalam kiba mynta kaba ka jingmut bad ka jingsngewthuh jong ki ka per tang ha sla,” ong u Bah Bindo.
U la ong ruh ba ka UDP kum ka seng riewlum kaba heh tam kan jop tang katto tylli ki seat ka long kaba sngewdiaw haduh katta katta hynrei u ong ba ka jingbym don nongïalam khamtam naduh ba khlad lei u Dr Donkupar ka dur jong ki nongïalam seng riewlum kiba kynsai ki la dujait syndon.
“Ka lawei jong ki seng riewlum ha ka jylla jong ngi lada ka ïai long sah kumne ka long kaba shitom bha ba kin ïoh ïalam ïa ka jylla. Ki nongïalam kiba mynshwa ki dang don ka mynsiem ban ïatreilang da ka jingmut ba skhem, ka rukom pyrkhat pyrdaiñ ba jylliew bad ka rukom pyrkhat pyrdaiñ ba shongkun bad shongnia bha, katba mynta pat ka jingpyrkhat kam pyrkhat jam kam long shuh kumba mynshwa namar ba kine ki ba mynta ki ïaid la kajong -kajong,” u la ong.
Haba kren halor ka jingmih pyrthei ka VPP kum kawei na ki seng riewlum kiba thymmai u Bah Bindo u la ong ba ka long kaba kloi than ban ong ba kan shim ïa ka jaka jong ka UDP.
“Ka long kaba kyndit ban ïohi ba ka VPP ka party kaba ïalam u Bah Ardent kaba la seng dang shen ka la lah ban tam kat ïa ka HSPDP tangba ngin dang hap ban ïapeit shuwa kumno ki treikam namar dei da ka jingtreikam jong ki kaba u paidbah un pynshong nongrim,” u la ong.