Ki kot ki sla ki dei ki atiar ba khlaiñ bor ban pynbeit ïa u pud u sam : Paul Lyngdoh

Shillong, Lber 15: U Working President jong ka United Democratic Party (UDP) uba long ruh u Myntri ha ka sorkar MDA 2.0 u Bah Paul Lyngdoh ha ka sngi Balang u la pynpaw ba ki kot ki sla ki dei tang ma ki ki atiar ba khlaiñ ban pynskhem ïa ka jinglong trai jong ka jylla Meghalaya ïa ki jaka ba don ka jingïakajia pud hapdeng ka Meghalaya bad Assam.
“Ki briew ki lah ban ong bun kiei kiei hynrei ki jingkren kin sah tang ki jingkren ha kaba kut kaba ïeng te dei tang ka jingshisha. Kumno ngin pynskhem ïa ki jingshisha kiba ngi kam halor ka jinglong trai ka jylla Meghalaya ïa ki jaka ïa kajia pud? Dei tang ki kot ki sla bad ki dulir namarkata, dei tang ki kot ki sla bad ki dulir hi kiba ngi donkam ym palat ïa kine,” ong u Bah Paul haba kren sha ki lad pathai khubor.
“Ngi lah ban ai ki jingkren kiba bang tam na kiba bang ha ka jingïalang paidbah ha Motphran hynrei ha kaba kut hi ban pynskhem ïa ka jingkamtrai ïa ki jaka da ka jylla donkam ïa ki kot ki sla. Pynskhem ïa ka jingkamtrai ïa kine ki jaka ha khappud da ki kot ki sla namar wei la biang ki kot ki sla ym don shuh mano mano ruh ban woh kjat wei ba ngi la kieng atiar da ki kot ki sla bad ki dulir,” u la bynrap.
Kane ka jingkren jong u Bah Paul ka long hadien ba u Myntri Rangbah ka Assam u Himanta Biswa Sarma u la kam ba ka Mukroh ka dei ki bynta jong ka jylla Assam.
Lah ban kdew hangne ba na ka liang ka UDP ka la kular ha ka Manifesto elekshon jong ka ba kan peit biang ban pynkylla ïa ka MoU kaba ïasoi hapdeng ka jylla Meghalaya bad Assam.
Haba kylli halor kane u Bah Paul u la ong ba na ka liang ka UDP kan ïeng beit ha ka nongrim ba ha ki khep kiba ka jylla kan ïohnong kan ïeng katkum ka MoU.
“Lada dei ba ngi lah ban ïohnong na kane ka MoU ngin ïeng da ka MoU hynrei haba don ki khep kiba ngin duhnong ngin hap peit biang ban pynkylla ïa ki kyndon kiba la ïasoi bad kane ka dei ka nongrim kaba kum ka party ngi ïeng haduh kat mynta ruh,” ong u Bah Paul.