Bthah u Dy. CM ïa ka tnat Kam Pohïing ban pynkhlaiñ ïa ki pyrton Pulit ha ki Border Out Post

Shillong, Lber, 16: U Symbud Myntri Rangbah u Bah Prestone Tynsong u la bthah ïa ka tnat Kam Pohing ban pynkhlaiñ ïa ki pyrton Pulit ha ki Border Outposts kiba don ha shilynter jong ka khappud Assam-Meghalaya.
“Nga ladep bthah ïa ki Ophisar ba kin pynkhlaiñ ïa ki pyrton Pulit ha ki BoP ha shilynter ka khappud jong ka Assam bad Meghalaya,” ong u Bah Tynsong ha ka jingïakren bad ki lad pathai khubor.
Ha ka 29 tarik, u snem baladep, ka Sorkar ka la rai ban buh ïa ki Border Outpost (BOP) ha ki hynñiew tylli ki jaka ba la ithuh kum ki jaka ba don ki jingïakajia ha shilynter ka khappud.
Kine ki jaka ki kynthup ïa ka Muriap ha East Jaiñtia Hills, ha Mukroh bad ha Tiwieh, West Jaiñtia Hills, ha Rani (Jirang) kaba hap ha Ri Bhoi bad ha Umwali, Lejadubi bad ha Langpih kiba hap ha West Khasi Hills.
Ïa kane ka rai la shim hadien ka jingsiat ïap jong ki Pulit ka Jylla Assam ha ka 22 tarik, Naiweing, 2022 ïa ki hynriew ngut ki briew ba kynthup ïa san ngut ki Khasi bad uwei u Forest Guard ka Assam kaba la jia ha ka shnong Mukroh, West Jaiñtia Hills District.
Ka jinglut jingsep ban shna ïa kawei ka BOP ka la kot haduh 2 klur tyngka.
U Bah Tynsong u la ong ba um pat ïohlad ban tohkit haduh katno ka tnat Kam Pohing ka la treikam namarba u DGP u dang don mynta hapdeng ka jingleit shah pyntbit.
Haba kylli halor ka jingpynrungkam, u Symbud Myntri Rangbah ula kular ba ïa kane ka kam yn sa pyndep noh kham kloi katba lah. “Nga ladep ai ïa ka jingbthah ba ngi dei ban pynstet ïa kane ka kam kaba la sahteng namarba ngi duna bha ka jingduna ki nongtrei ha ka tnat Pulit ha ka jylla,” u la ong.