Ka UCC kan ktah jur ïa ki District Council bad ïa ki Riti ki Dustur tynrai: Robert June Kharjahrin

0

Shillong, Lber 16: U Bah Roberjune Kharjahrin, President ka HYC, uba long ruh u Nongsaid aiñ, u la ong ba ka lada ka Uniform Civil Code (UCC) kan treikam ha ri India kan ktah jur ïa ka Sixth Schedule ne ïa ki District Council bad ïa ki riti ki dustur ha ki ïing ki sem ba la tip kum ki Family Law ne ki Personal Law.
Haba ïakren bad u Nongthoh khubor, u nongïalam ka HYC u la pynshai ba ka UCC kadei beit tang kawei ka aiñ ka ban treikam ïa baroh ki jaitbynriew ha ri India. Ki ban shah ktah eh dei ki riti dustur ha ïing hasem kum ka shongkha shongman, ka pyllait san shyieng, ka jingting khun bad ka jingïoh pateng la ka long ïa ka khyndew ka shyiap ne ïa kiwei pat ki bynta.
“Kumba long mynta ha ka riti ka dustur jong u Khasi, ka khun khatduh ka ïoh khambun ka bha ne ka nongpateng na ki kmie ki kpa, hynrei lada ka UCC ka treikam ka lah ban wan ha ka rukom jong ka ki jaidbynriew heh paid, ha kaba u khun shynrang u lah ban ïoh ïa ka bynta kaba khambun”, la ong u Bah Robert, da kaba bynrap ba kane ka lah ban ktah ruh wat ïa ka rukom shim jaid ruh.
Shuh shuh, u la ong ba kane ka jingktah ka UCC ïa ki riti ka dustur ka ktah ruh ïa ki Autonomous District Council namar ba kidei ki nongri nongsumar ïa ki riti ki dustur bad lada ki District Council kim don bor shuh ban ri bad sumar îa ki District Council kaei pat ka jingmut ba kin don hangne.
Ha kaba ïadei bad ki aiñ shongkha shongman kan ktah pat ïa ka rukom pynïaid Balang, namar ba ka UCC kan don beit tang kawei ka aiñ bad ki jait niam ne Balang kiba pynïathoh shong kurim lyngba ka Christian Marriage Act kumba ju bud ka Balang Presbyterian, ha kaba u Pastor u long u Marriage Officer, kane ruh kan duh noh bad u Pastor un long tang kum u nongpynïaid jingïaseng katba ïa ka Certificate ïathoh pat yn hap soi da u Magistrate.
U Bah Robert u la ong rub ba ka UCC kan ktah bha ïa ki Dorbar trai ri naduh ki Dorbar Hima, ki Dorbar Raid haduh ki Dorbar Shnong, namar ba ki rukom pynïaid shnong ne ki rukom synshar Hima, synshar Raid kin nym lah shuh ban treikam shisien ba la don tang kawei ka aiñ ha baroh kawei ka ri India, namar ba ka District Council ka la duh ïa ka bor jong ka ban peit ban khmih ïa ki aiñ halor ka riti ka dustur ne ban thaw aiñ.
Ka UCC kan ktah ruh khyndiat ïa ka sorkar jylla namar ba kan ïatyngkhuh bad ka Self Aquired Property Act ne ka aiñ bhah ka jingïoh pateng.
Dei namarkane ka daw u President jong ka HYC, u la ong ba ka long kaba donkam ba ki lai tylli ki ADC ha ka jylla, kata ka KHADC, ka JHADC bad ka GHADC kidei ban wanrah da ka Resolution ban pyrshah ïa ka UCC bad ka sorkar pat kadei ban kyrshan nadien. “Kam biang ban shu pyrshah tang ha ki kot khubor, hynrei ka sorkar jylla ki District Council kidei kiba la jied da u paidbah bad kiba la ithuh da ka Riti Synshar jong ka ri India kan kren briew shibun lada ki leh ne pyni da ka kam”, u la ong, da ka bynrap ba ki dorbar trai ri kin hap ban pynpaw ka jingpyrshah namar ka ktah ïa ka rukom pynïaid shnong katkum ka riti ka dustur uba rim.
U la ïathuh ruh ba wat ka National Law Commission ruh ha u snem 2018,ka la pynpaw ba ka por kam pat dei ban pyntreikam ïa ka UCC namar ba ïa mynta hi ki aiñ kiba don ha ri India ne ki jait aiñ kiba don ha ka ri ki dang biang. U la ong ba ñiuma ka Supreme Court ka la pynpaw teng ba ka por ka la biang ban pyntreikam ïa ka UCC, hynrei u la ong ba ka ïingbishar badon burom hi bunsien ka shim nuksa na kawei ka jingjia ban batai ïa ka jingthmu ne ïa ka jingpynpaw jong ka.
U la pynshai ruh ba ka jingbuh ki nongthaw ïa ka riti synshar jong ka ri India ïa ka UCC ha ka riti synshar, kadei kaba ki la pynap pypa ïoh don ka jingbymïaid shuh ki aiñ kiba ïadei bad ka riti ka dustur ïoh don ki bym burom shuh ïa ki riti ki dustur jong u mynbarim ne ba ki aiñ kim ïahap shuh kaba mut hap ban pyndonkam noh da ka UCC. Hynrei kumba long mynta hi, hapdeng kiba bun ki jingduna ne ki jingbymbit bymbiang, kiba bun hi ki aiñ ne ki riti ki dustur ki dang biang bad lada dei ban pynbha dei tang kita kiba sngewthuh ïa la ki jong ki aiñ bad ki riti ki dustur kiba lah ban pynbha, ym dei ka Parliament ka bym tip ne sngewthuh ïa ki riti ki dustur.

Leave A Reply

Your email address will not be published.