Shillong, Lber, 16: Ka Sorkar Jylla ka la aipor ïa ka Harijan Panchayat Committee (HPC) ban phah ïa ka jubab hashwa ka 10 tarik, Ïaïong, ha kaba ïadei bad ka jingtyrwa ban pynkynriah noh ïa ki 342 tyllli ki longiing kiba don ha Sweepers’ Colony na Them Iew Mawlong sha ka jaka jong ka Shillong Municipal Board (SMB).
“Ngi ladep aiti sha ki ïa ka Blueprint (katkum ka jingtyrwa jong ka Sorkar) bad ngi la aipor ruh ba kin hap ai jubab tad haduh ka 10 tarik, Ïaïong,” la ïathuh u Symbud Myntri Rangbah ka Jylla uba peit ïa ka tnat Pynroi Sor u Bah Sniawbhalang Dhar ha ka jingïakren bad ki lad pathai khubor hadien ba la wai ka jingïalang jong ka tnat Pynroi Sor.
U la ong ba kane ka jingbthah ka long hadien ba ka HPC ka la pan por sa lai bnai kynthih ban ai jubab ïa ka jingtyrwa jong ka Sorkar.
“Hynrei, ngim shym la mynjur ïa ka jingkyrpad jong ki bad ngi la rai ban aipor ïa ki tad haduh ka 10 tarik, Ïaïong ban ai jubab ïa ngi,” ong u Bah Sniawbhalang bad bynrap, “hadien kane tang ka high level committee (HLC) ka ban sa khot ïa ka jingïalang kaba lah ban shim ïa ka rai khatduh halor kane ka kam.”
Haba kylli, u Symbud Myntri Rangbah u la ong, “ngi sa hap ban ïohsngew nyngkong eh na ka liang jong ki (HPC) bad hadien kata ngin sa leh ban pyntip kaei kaba ngi dei ban leh bad kaei kaba ngim dei ban leh. Ngam pat lah ban ong eiei ïa mynta kaei kaba ngin leh nangne shakhmat.
