Shillong, Lber 18 : Ka National Cricket Academy (NCA) jong ka BCCI ka la jied ïa ki 4 ngut ki khynnah ïalehkai kriket jong ka Meghalaya Cricket Association (MCA) kiban shah hikai pyntbit ha ka ktem kilen met jong ka Zonal Cricket Academy (ZCA) kaba don ha Guwahati kaban sdang naduh u bnai Ïaïong ban wan.
Kitei ki saw ngut ki khynnah ki kynthup u Jarrett Medonlang Wanniang uba pule ha Christian Academy, Riatsamthiah, Gaurav Jyoti Thakuria ha BK Bajoria School, Boyce Road, u Angkit Tamang ha Kendriya Vidyalaya, NEHU bad u Rudra Singh Rathore uba pule ha St Xavier’s Secondary School, Polo.
Katei ka prokram kilan met kan sdang naduh ka 17 tarik u Ïaïong haduh ka 11 tarik Jymmang 2023.
Ki don baroh 25 ngut ki player na kylleng ki jylla jong ka ri India kiba la shah jied ban ïadonlang ha katei ka ktem kilan met ba pynïaid da ka All India Junior Boys Selection Committee jong ka BCCI.
La jied ïa kitei ki khynnah katkum ka jinglah jong ki ban ïalehkai bha ha ka U-16 Vijay Merchant Trophy kaba dang shu kut kaba la sdang ha ka 1 tarik haduh ka 23 tarik Nohprah 2022 ha Baroda.
