Ngim dei ban klet ïa ki lanot bad kiba lait im na ka jingpynïakhlad ka India, Bangladesh bad Pakistan: Prof. David

Shillong, Nailar 14: Ka Lok Bhavan Shillong, ha ka jingïatreilang bad ka tnat Arts and Culture ka sorkar jylla ka la rakhe ïa ka Partition Horrors Remembrance Day ha ka sngi Thohdieng ha Lok Bhavan, Shillong, ban kynmaw ïa ki lanot bad kiba la lait im ha ka sngi ba pynïakhlad ïa ka ri India ha u snem 1947.
Ka prokram ka la sdang da kaba kyntiew ïa ka lama jong ka ri da u Lat ka jylla u C.H. Vijayashankar ha ka jingïadonlang Director of the Arts and Culture, ki heh ophsar na ki tnat bapher bapher, ki samla pule bad kiwei kiba la shah khot sngewbha.
Haba pynbud ïa ka prokram kyntiew ïa ka lama, kiba la shim bynta ki la leit pat sha ka jingïalang hapoh Durbar Hall ka Lok Bhavan, ha kaba la pynlong ïa ki prokram kolshor ba la wanrah da ki samla pule, ba la pynbud da ki jingkren lamphang shaphang ka jingkyrdor ka jingim bad kumjuh ruh ka jingjia kiba la neh na kane ka jingpynïakhlad.
Haba kren ha ka jingïalang u Dr. David Arnold Kharchandy, Assistant Professor ka Synod College, u la ong ba kane ka jingpynïakhlad ym dei ban sngewthuh tang ka jingmih na ka saiñ pyrthei kaba kdew ïa ka jingkut noh ka synshar ka ri Britain bad ka jingmih jong ka India bad Pakistan.
U la ong ba da ki million ngut ki riew paidbah, kane ka jingpynïakhlad ka mut kham palat ban ïa ka jingruid laiñ ne ka Radcliffe Line ïa ka map. Hynrei ka jingmih ka long ka jingduh noh jong ki ïing ki sem, ka jingïakhlad ki longïing longsem, ka jinghuri hura jong ki kynhun bad ka jingsdang jong ka jingïaid lynti ka bym thikna na ka bynta ki briew kiba la shah pynbor ban ieh shadien baroh kiba ym da ïasynriem.
U la banjur ba ka jingkynmaw ïa ka jingpynïakhlad ka long kaba kongsan namar ka khana pateng ka dei ban ïaid shalyndet ki jingkheiñ bad u pud u sam ka saiñ pyrthei bad ban ithuh ïa ki jingmad jong ki paidbah kiba la im lyngba kine ki jingeh.
Haba phai sha ka Meghalaya bad ka thaiñ shatei lammihngi, u Dr. Kharchandy u la ong ba ka jingpynïakhlad ka don ka jingmih kaba kongsan na ka bynta ka thaiñ, kyrpang ïa ka jingthaw ïa u pud u sam bad ka ri Bangladesh. Ka jingwan ki poi wir ka la nangjur, ka lynti khaïi pateng ka la kylla, bad ki longïing bad ki kynhun ki shem ïalade ba ki la shah pynkynriah da kine ki pud ki sam ba thymmai ha ka saiñ pyrthei.
“Ka jingpynïakhlad kam dei tang ka khana jong ka Delhi, Punjab ne Bengal. Kadei ruh shi bynta jong ka khana pateng ka thaiñ shatei lammihngi,” u la ong da kaba kyntu ïa ki khynnah pule ban mad ïa ka jingpynïakhlad kaba khamjan.
U la kyntu ïa ki khynnah skul ban kynmaw ïa ki lanot bad kiba lait im na kane ka jingpynïakhlad, ban pule ïa ka khana na ki jingkhmih kiba bun rukom, ban kylli ïa ki hamsaïa, pynshisha ïa ki jingïoh jingtip bad ban kyntait ïa ki jingpynsaphriang jaitbynriew. U la khot ïa ki ban burom ïa ki briew kiba long na ki niam bapher bapher, ki jaitbynriew, ki caste, class bad ki nongrim jong ki ktien.
Kane ka jingrakhe ka long ka jingpynkynmaw ïa ka jingkordor jong ka jingim na kane ka jingjia bad ka jingdonkam ïa ki pateng ba mynta ban kynmaw ïa ki lanot, ban shemphang na ka khana bad ban trei khambun na ka bynta ka suk ka saiñ bad ka imlang sahlang kaba tei.