Nongstoiñ, Nailar 14: U MDC jong ka Parïong-Mawthadraishan, u Bah Powell Sohkhlet, haba kren ha ka jingïalang pynkup burom ïa ki samla ba pass ïa ka eksam SSLC na Markasa Secondary School ha ka sngi thohdieng, u la ong ba kaba nyngkong ba ki Samla pule ne ki Khynnah Skul ki donkam ka dei ka jingtrei shitom, ka jingminot bad kumjuh ruh ka jingïarap U Blei ha ki jingpule jong ki lyngba ki jingduwai.
“Ngi im ha ki sngi ba ka jur bha ka jingïakhun ne ïakop ban paw shakhmat ha ka pule puthi. Tang na ka bor nalade kan long kaba eh ban ïoh ïa ka jingjop. Ngi donkam ruh ban wad ïa ka jingïarap na U Blei ha ki jingduwai jong ngi”, ong u Bah Powell u ba long ruh mynta u EM ka Land, Development jong ka KHADC.
Na ka liang u Bah Powell u la ai mynsiem ruh ïa ki khynnah skul ba kim dei ban tieng ban tur ïa ki raieh ki raidam ha ka lynti ïaid jong ki ha ka pule puthi. Hynrei, ban tur shaphrang da ka jingshlur kaba ïaid ryngkat ryngkat bad ka akor ka burom lem bad ka jinglong tip briew tip Blei.
Da kaba synñiang bad ka skul na ka bynta ki 29 ngut kiba pass matrik ban ai mynsiem ïa ki, u Bah Powell u la ai khublei kyrpang ruh ïa I Headmistress, ki Nonghikai, ki dkhot la MC bad kumjuh ruh ïa ki kmie ki kpa namar ka jingpass bha ka skul da kaba ïoh 100 percent. Kine ki kynthup 11 ngut kiba ïoh First Division, 14 ha ka Second Division bad 4 ngut ki Simple Pass. Bun ngut ruh ki la ïoh letter mark ha ki objek bapher bapher.
Ha kane ka prokram la ïoh ruh ïa ka jingkren na I Headmistress Kong L. Nongphud, u Sordar ka Shnong Markasa, M.Lyngkhoi, kiba la pynpaw ïa ki kyntien jingai mynsiem, ai khublei bad kitbok kit rwiang. Kiwei pat kiba la sakhilang ïa kane ka sngi ki long ki dkhot ka MC lem bad ki kmie ki kpa.
Ha kane ka sngi la ai burom kyrpang ïa I Miss S.Myrthong I ba la shakri ïa ka skul mynta la 25 snem kum ka Nonghikai, katba ïa ka jingïalang kaba shongkun bad iphuh iphieng bha la pynïaid da u Babu D.Lyngdoh.
