Nongstoiñ, Nailar 14: Ka seng ki nongrep na West Khasi Hills lyngba ka lama jong ka Hills Farmers’ Union West Khasi Hills District, ha ka sngi thohdieng 14 tarik Nailar 2026, ka la lum la lang ïa baroh ki dkhot sha ka jingïalang ki nongrep, kyrpang eh na ka bynta ki nongri sniang ban phylliew jingmut halor ki jingeh ba har rukom ba kum ki nongri sniang ki ïakynduh na ka por sha ka por, khamtam ha kaba ïadei bad ka jingïap khlam jong ki sniang bad kiwei.
Hadien ka jingïalang kaba la long ha Hall jong ka ophis u Syiem Hima Nongstoiñ, u nongïalam ba hakhmat jong ka HFU West Khasi Hills u ba bat ruh ïa ka kyrdan kum u General Secretary u Bah Chester Kharbani, u la ong ba da kawei ka sur katei ka jingïalang ka la shim ïa ka rai ban phah da ka jingthoh sha ki bor District, ba kin khang noh ïa ka jingwanrah ïa ki sniang na shabar ka District. Kumjuh ruh dei ban khang ïa kiba wan nabar ka Jylla, khamtam na ki shnong ba don ki sniang kiba la shah ktah ha ka jingpang khlam.
Shuh shuh haba batai bniah sha ki lad pathai khubor, u la kren shai ba ka Seng kan thoh ruh ba dei ban da phah test shwa ïa ki sniang hashwa ban ot doh, khnang ban lait na kino kino ki jingma ïa ki nongbam doh sniang bad ïa ki nongri sniang.
U la ong ruh ba ka seng HFU ka kyrpad ruh na ka sorkar ba ka dei ban map noh ïa baroh ki nongri sniang kiba shim ram ban ri kiba la shu duhnong noh, namar ka jingïap khlam ki sniang bad ban ai jingkyrshan ruh ïa ki ba kin lah biang ban ïeng ha la ki jong ki kjat.
U la ong ruh ba ka HFU ka la rai ba kan sa thoh sha ki bor District, ba ki dei ban bthah sha kito ki jaka khappud ba ki dei ban sangeh ïa ka jinglum pisa beaiñ na ki nongri jingri, la ka dei ïa ki sniang ne ki masi bad kiwei kiwei ki jingri.
Ha kajuh kapor ka Seng ka kyntu ruh ïa ki nongkhaïi bad nongdie doh, ba kim dei ban shim kabu ïa ka dor ka mur. Kumjuh ruh ban sangeh noh shisyndon ban shim sniang na kiwei ki District lane na ki shnong ba ka jingpang khlam ka la don.
