Byrthen ka KSU ban pyni bor lada ym jubab ka sorkar halor ki san tylli ki mat jingdawa

Nongstoiñ, Nailar 14: Ka Seng Khasi Students Union Central Executive Council ryngkat ka KSU West Khasi Hills District Unit ha ka sngi thohdieng 14 tarik u Nailar 2026, ka la pynlong ïa ka jingïalang ban pynshai paidbah halor ki san tylli ki mat jingdawa kiba ka seng ka la dawa bad ai por ruh ïa ka sorkar Jylla, ba ka dei ban pynurlong ïa kitei ki mat jingdawa hapoh 15 sngi bad ka por ba ka la dep ai ruh ka la jan kut.
Ïa katei ka jingïalang pynshai paidbah na ka liang ka seng ka la ïoh ban pynlong ha ka Market Complex New Nongstoiñ, ha kaba la sakhi da ka jingïadonlang ki nongïalam ba kham hakhmat ba kynthup ïa u Vice President ka KSU Sengkmie u Samla Pynkmen Sanmiet, u Samla John Fisher Nongsiang President ka KSU West Khasi Hills, u Samla Franklin Syiemïong General Secretary ka KSU West Khasi Hills, ki nongïalam shnong, ki Seng longkmie bad kiwei de ki dkhot ka KSU na Sengkmie bad na West Khasi Hills.
Na ka liang ki nongïalam ki la pynshai bad paidbah halor ki san tylli ki mat jingdawa ba kynthup ban pyndam noh ïa ka public hearing jong ka shree cement bad sospon ïa u DC bad SP ka East Jaiñtia Hills bad ïa ki ophisar ka MSPCB.
Nangta ban pynurlong noh ïa ka MRSSA Act 2016, ban pynurlong noh ïa ka jingpynkylla (Amendment) ïa ka Meghalaya Identification Registration Safety and Security of Migrant Worker Act 2020, ban pynbeit noh ïa ki jingeh ha ka rukom thungkam ha NEIGHRIMS bad ban thungkam thungjam da kaba shai bad ban pynduh noh ïa ka personal interview.
Halor kine ki mat ki nongïalam ka seng ki la pynpaw ruh ba ka jingai por ban pynurlong ïa kine ki mat ka la jan kut artad, ka shong sa ha ka sorkar aiu kan jubab. Lada hadien ka jingai por ka khlem jubab ei ei, ka seng kan shim ki sienjam kiba tyngeh pyrshah ïa ka jingmutlop jong ka.