Shillong, Nailur 27: Ki jingkylli ki dang mih halor ka jingpynlut pisa kaba palat 12 klur tyngka da ka Garo Hills Autonomous District Council (GHADC).
Katkum ki jingkheiñ ba la kdew da ka Niksamso Garo Community Organisation (NGCO), ka Council ka la lum haduh 13, 53, 79, 820 klur tyngka na la ki jong ki tyllong khajna bad ki khajna haduh ka 22 tarik u Naitung, 2026, ha kaba la pyntip ba la pynlut haduh 12, 33 ,87, 844 klur tyngka.
Mynta ki paidbah ki wad ïa ka jingtip kaba shai shaphang shano bad kumno la pyndonkam ïa ka pisa, la ong ka seng.
Ha ka kyrwoh, ka NGCO ka la ong ba ki briew ki don ka hok ban tip la ka pisa ka dei kaba la pyndonkam na ka bynta ki kam pynroi, ka tulop jong ki nongtrei, ki jinglut jingsep ha ka synshar khadar ne kiwei kiwei ki jingthmu, bad ka la dawa ba ka Executive Committee kaba dang shu thaw thymmai kan pynpaw paidbah ïa ki jingtip ba bniah jong ka jingpynlut.
“Ka EC jong ka GHADC kam pat ai ka jubab kaba shai bad kaba bniah ha kaba ïadei bad ka jingpyn donkam ïa kine ki pisa,” ka la ong da kaba kyntu ïa ka Council ban pynmih ïa ki record ha kaba ïadei bad ka pisa bad ban pynthikna ïa ka jingkitkhlieh.
“Ka khajna paidbah ka dei jong ki paidbah.Ka jinglong khuid bad ka jingkitkhlieh ka long kaba donkam bha”, la bynrap biang ka NGCO.
