“Ngi ju thep vote MLA bad MDC sha Meghalaya, kumno ym pat ithuh riewlum ïa ngi,” ong u Bah Obress Kholar

Shillong, Naitung 06: U Bah Obress Kholar u ba dei u Chairman jong ka Dorbar Raid Basan uba la wan ban ïashim bynta ban dawa ithuh riewlum noh ïa ki Tiwa Lalung, u la ong ba ki ïoh ban thep Vote ha ka elekshon sha ka Ïing Dorbar jong ka United Khasi-Jaiñtia Autonomous District Council bad mynta ka Khasi Hills Autonomous District Council hynrei ïa ki pat ym shym la ithuh kum ki riewlum kane ka jylla Meghalaya.
Na ka liang jong u, u la buh ka jingkylli ïa ka sorkar Meghalaya bad kumjuh ïa ka District Council sa katno snem ki dang ïai peit ïai khmih ïa kane ka phang namar kim dei ki nongwei ki dei ki trai shnong na ka jylla, mynshuwa dang dei ka Assam ki hap ha ka jylla Assam, ynda la ïoh ïa ka jylla Meghalaya kila hap ha Meghalaya sa kaei pat dang duna, u la kylli.
U la ong ba man ka elekshon MLA bad MDC ki thep ïa ka vote ka jong ki ha Meghalaya bad KHADC, haba ki ïakren bad ki bor sorkar pat ki ong ba kin dang ïa peit sa katno por kin dang ïa peit ïa kane ka jingdawa ka jong ki, kum ka Dorbar raid bad ki Basan ki dawa ba ki dei ban ïoh noh ïa ka jingithuh kum ki riewlum kane ka jylla Meghalaya.
Ki la ïathuh ba kum ki nongïalam ka dorbar raid kila ïa kynduh ruh ïa u MLA jong ki u Charles Marngar bad kila ïakren ïa kane ka phang bad wat na ka liang jong u Syiem ka Hima Khyrim ruh u la dep ban ai da ka jingthoh sha u Myntri Rangbah ka jylla ban pynthikna ba ki dei ki khun ki hajar ka Hima Khyrim.