Lajan 30 snem la ïaid ki jingdawa ban ïoh jingithuh riewlum ki jaitbynriew Lalung Tawa na Meghalaya

Shillong, Naitung 06: Ka ka jaitbynriew Lalung Tiwa kiba don antad 10,000 ngut eiei ki nongshong shnong kiba hap hapoh ka Hima Khyrim kiba dei ki riewlum ha kane ka jylla Meghalaya ki la ïathuh ba ki la ïaksaid naduh u snem 2000 ban ïoh ïa ka jingithuh na ka jylla Meghalaya ha kaba ïadei bad ka syrnot Schedule Tribe hynrei haduh mynta ka sorkar bad ka KHADC ki dang sngap jar jar.
Halor kane haba kren ha ki Lad pathai khubor ha Shillong Press Club u General Secretary ka seng samla pule ka All Tiwa Student’s Union u Albert Dilar u la ong ba ïa ka jingthoh kaba nyngkong kila ai ha u Myntri rangbah barim ka jylla u Bah E K Mawlong (Bam kwai ha dwar u blei) ha u snem 2000, kila ai ruh ïa kajuh ka jingthoh sha ki Myntri rangbah kiba wan hadien jong u bad ha kane ka sorkar mynta kaba la ïalam da u Conrad K. Sangma kila ai ar sien.
U la ïathuh ba shuwa ban ïoh ïa ka jylla Meghalaya ki don ha ka jylla Assam dei ha u snem 1951 la phiah ïa ki ha ka United Khasi-Jaiñtia Hills Autonomous District Council bad sha ka Karbi Anglong Autonomous District Council bad haba la ïoh ïa ka jylla Meghalaya ha u snem 1972 kila hap ha Meghalaya hynrei wat la ki dei ki trai jylla ka sorkar kam shym la ithuh kum Schedule Tribe ne ki Riewlum kane ka jylla kumba long ki Khasi, Jaiñtia bad Garo.
Shuh shuh u General Secretary ka ATSU u la ong ba ha kane ka jingwan ban pynsngew ïa ka jingdawa jong ki ban ïoh ïa ka syrnot Schedule Tribe kam dei tang na ka seng samla pule hynrei la donlang na ka synjuk ki rangbah shnong, na ka Dorbar Raid ka hima Khyrim, ïa kaba u Syiem ka Hima u la dep ban ai ïa ka jngpynshisha bad ki dei ruh ki nongthep vote ka jylla Meghalaya, bad ki la buh ruh ka jingkylli ba katne la pynshisha balei ka sorkar ka dang pynslem.
Ki la ong ba kum ka jaitbynriew Tiwa ïa kaba la tip ruh ia ki kum ki Lalung kin pyndonkam ïa baroh ki lad ki lynti kaba don ha ka riti synshar ban ïaleh ban pynïoh ïa ka hok ka jong ki namar ki dei ki riewlum jong kane ka jylla Meghalaya ka jingdawa ka jong ki ka long ba ka sorkar ka dei ban ithuh noh ïa ki kum ki Riewlum ka jylla Meghalaya ha shwa ban pyndep ïa ka khanasamari jong u snem 2027 kaba la ïaid mynta ban pynshisha lyngba ki electoral roll kaba la tip kum ka SIR.