Ha u DC-EJHD ujor ka JNC-KC bym treikam bha ka jingsam jingbam ka SPN hapoh ka Distrik

Khliehriat, Naitung 06 : Mynta ka sngi ka Jaiñtia National Council, Khliehriat Circle hapoh ka jingialam u Working President u samla Diamon Bareh kala buh da ka jingujor sha u Deputy Commissioner jong ka East Jaiñtia Hills District halor ka jingthut treikam kaba jur jong ka Supplementary Nutrition Program (SNP) hapoh ka District.
Ka seng ka la pynpaw ba “Katkum ki jingbthah jong ka sorkar, ki khynnah kiba hapoh hynriew snem bad ki kynthei kiba armet bad kiba ai buiñ ki don hok ban ïoh ïa ka jingbam tei met ban pyndap na ka bynta 25 sngi ha ka shibnai, kynthup ïa ki jingbam ba la shet man ka sngi bad ki jingbam mynstep na ka bynta ki khynnah kiba naduh 3 snem haduh 6 snem kyrta ha ki Anganwadi centre, hynrei katkum ki jingujor na kiba bun ki shnong kynthup ïa ka Khliehriat la ong ba ki jingbam ki ioh tang shisien ha ka shibnai, ar ne wat lai bnai bad ym don jingbam ba la shet ne jingbam step na ka bynta ki khun rit, kane kam dei ka “jingbakla kaba rit” ha ka liang ka jingioh myntoi hynrei ka dei ka jingkyntait beit ïa ki hok ba kongsan jong ka jingbam na ka bynta ki khynnah bad ki longkmie ba armet”.
“Ha ki jingiakren ka seng bad ka CDPO, la pyni ba ki jingpynbiang bad ki jingpynrung pisa la kynnoh ba ki poi sha ka distrik tang shisien ha ki ar ne lai bnai, kaba pynlong ïa ka ban ym lah ban bud ïa ki kyndon, lada kane ka long kaba shisha, ka pynpaw ïa ka jingbymlah jong ka rukom treikam ha ka kyrdan jong ka jylla/district bad ruh lada ka long kaba bakla, ka buh jingkylli kaba khia halor ka jinglong hok ne jingiaid beit jong ka jingpyntreikam bad jingai jingtip ha ka jaka, ha baroh ar tylli ki khep, dei ki khun khynnah bad ki longkmie jong ka East Jaiñtia Hills kiba shem jingeh” ong u kyrwoh.
“Ka JNC ka dawa ïa ka jingtohkit halor ka jingpyntreikam ïa ka SNP ha East Jaiñtia Hills District, kynthup ïa ka jingkheiñ jingdiah kaba man u bnai ïa ki mar bam ba la ïoh na ka jylla bad ki jingsam ba la leh sha man la ka jaka ba don ki Anganwadi. Ngi kyntu ïa u Deputy Commissioner ban pynthikna ba ka jingkitkhlieh kan long kaba la buh thikna la ka long ha ka kyrdan district ne jylla, bad ba dei ban shim ïa ki lad ban pynbeit mardor khnang ba ka skhim kan treikam beit kumba la kular ha ka policy, ym tang ha ka kot jingthoh”.
“Ngi kren shai ba ka seng kan ïai buddien bha ïa kane ka kam. Ka jingdawa jong ngi ka long kaba shai bad kaba ym dei ban shim sting, khnang ba ki khynnah bad ki kmie haka thaiñ ki dei ban ïoh ïa ka jingbam bad ka jingbam kaba long ka hok jong ki, man la u bnai, ha man la ka shnong” pynkut u kyrwoh na ka JNC Khliehriat Circle.