Dawa ka KJCLF ban wanrah ka Sorkar da ka Resolution hapoh ïing Dorbar Thaw Aiñ ka jylla

By Mawphor Editor On Jul 7, 2026

Shillong, Naitung 7 : Ka Khasi Jaintia Christian Leaders Forum (KJCLF) mynta ka Lah Sngi U Blei ka la pynpaw ka jingsngewnguh ïa u Myntri Rangbah ka jylla u Conrad K Sangma uba la ïalam ïa ki Nongïalam niam bapher bapher ban pynpaw ka jingsngewkhia jur halor ka jingwanrah jongka Sorkar Pdeng ïa ka jingthmu ban pynkylla ne ka Amendment Bill 2026 ha ka FCRA ha u Myntri kam pohïing ka sorkar pdeng u Amit Shah ha nongbah New Delhi.
Ha ka jingpyllait khubor na u Secretary ka KJCLF u Rev Edwin H Kharkongor u la ong ba ka jingïakynduh bad u Amit Shah ka long ban pynpaw hakhmat jongu kumno kane ka jingwanrah ka jingpynkylla ïa katei ka aiñ kan ktah ïa kiba bun ki Balang bad ki Niam ha ka jylla Meghalaya.
“ Ngi sngewkmen bad ai burom ïa ka jingïohi jngai bad shim khia jong u Myntri Rangbah ka jylla u Conrad K Sangma lem bad ki Nongïalam Niam napoh ka jylla ban leit ïa kynduh ïa u Myntri Kam Pohïing ka sorkar pdeng u Amit Shah bad ïoh ruh ban pynpaw ha u ïa ka jingsngewkhia jur halor ka jingthmu ban wanrah ia ka FCRA Amendment Bill 2026 bad khamtam eh ban pynpaw ka jingpyrshah halor ki aiñ jongka FCRA Amendment Rules 2026.
Ka Forum ka la ïoh ban pynpaw ba ki tnad pule bad ki tnad ai jingsumar kiba pynïaid da ki Balang ne ki Niam bapher bapher ne da ki kynhun ki don ka bynta kaba khraw hapoh ka jylla khamtam sha ki jaka kiba ka sorkar kam pat lah ban leit ai jingïarap.
“ Ka jylla ka sngewdiaw ba kane ka jingthmu ban warnah ka jingpynkylla kan ktah jur ïa kiba bun ki prokram khamtam ha kaba ïadei bad ka pule puthi bad ka koit ka khiah kiba ai ka jingshakri ïa ki paidbah ka jylla Meghalaya. Kine ki tnad pule bad jaka sumar ki don ha kito ki jaka kiba ka sorkar kam pat lah ban pynpoi ïa ki jingïarap” ong ka kyrwoh.
Hadien kane ka jingïakynduh ia u Myntri Kam Pohiing ka sorkar pdeng na ka liang ka Forum ka kyntu jur ïa ka sorkar ban rah ïa kane ka kam hapoh ka ïing Dorbar Thaw Aiñ ka jylla da kaba wanrah da ka Resolution.
“ Hadien katei ka jingïakynduh ia u Myntri Kam Pohïing ka KJCLF ka kyntu ïa u Myntri Rangbah bad ïa baroh ki MLA hapoh ka jylla ban wanrah da ka jingïamynjur lang da ka Resolution hapoh ka ïing DOrbar Thawain ka jylla ban pynbor ïa ka sorkar pdeng ba kan pynsangeh noh ïa katei ka jingthmu ban wanrah ïa katei ka FCRA Amendment Bill 2026 kumba la leh ruh da ka Assembly jongka Kerala ha ka 1 tarik Naitung 2026” ong ka kyrwoh na u Rev Kharkongor.
Ka Forum ka kyntu ïa u Myntri Rangbah bad ia ki Nongialam Niam ba kin rah ïa kane ka khubor sha baroh ki jylla kane ka thaiñ shatei lam mihngi ba kin ïa tylli ban shim beit da ka Resolution halor kane ka Amendment Bill 2026.