Ngam wan ban ïam ne kren pynbiej elekshon, 2 tarik ngin sa kynther ïa ka ktieh : Dr. Aman

Shillong, Rymphang 14 : U kyrtong ka UDP na Shillong North, Dr. Aman War ha ka sngi Ba-ar u la sdang ïa ka jingïalap elekshon paidbah na Lad Jaïaw Shyiap, Lumpyllon bad Upper Lansonalane kaba dei ka pdeng jong ka constituency ha shwa ba un ïaid pat sha kiwei ki bynta jong ka constituency.
Haba kren ha katei ka jingïalang, u Dr. War u la ong, “Ngim wan hangne ban pynbiej lane ban kren jali jaum bad ruh ban ïam ha khmat jongphi hynrei ngi wan namar ngi ïohsngew ïa ka jingud ka jingnam jong ki para shnong kat shaba ngi ïaid la ka long naduh ki longkmie longkpa bad haduh ki samla.”
Ha katei ka jingïalang kaba la donlang ruh da ki nongïalam ka UDP kynthup naduh u Bah Paul Lyngdoh, u Bah Allantry F Dkhar bad Bah Joe Marweiñ, u kyrtong u la ong ruh ha ka jingïaid jong ki kylleng ki la ïohsngew ba baroh ki ud ba ka synshar khadar ha ki san snem ka la wanrah ïa ka shitom ka jynjar bad ka jingduk jingshitom.
Nalorkata, u la ong ruh ba ki don bun ki nongshong shnong, la ka long naduh kiba la nang la stad haduh kiba trei kam ba rit kiba la pynpaw ba kim don shuh ka jingshaniah ha kane ka sorkar ba mynta.
“Wat ha ki jaka ba shong kiwei ki jaidbynriew ruh ki la ud ïa ka jinghiran ka shitom bad kine baroh ki la wan ban donlang bad ka bom namar ki kwah ïa ka synshar khadar kaba khuid ba suba,” u la bynrap biang.
Shuh shuh u ong ruh ba lada kren halor u drok baroh ki shu kut tang ha ki jingïalang pynshai hynrei ym don pat ba shimkhia ban leh pyrshah. “Ka UDP ka ieng ban rat dyngkhong ïa ki jingsniew kiba buh jingma ïa ki paidbah.”
U ong ruh ba sa shisien ki kwah ban kyntiew biang ïa katei ka constituency kaba tip kum ka Jabieng jong ka Ri Khasi.
Shwa kane, u kyrtong u la ong ruh ba lada ka UDP kam lah ha kane ka khep ban wan ha ka bor, khlem pep kan sa poi sha ka jynjar namar ki seng kiba thymmai ki wan sha kane ka jylla namar ki ïohi ba ki lah ban pynbiej.
“Ka UDP ka don ar tylli ki nongrim, kata ban synshar katkum ka jingkwah jong u paidbah bad kawei pat ban pynurlong ïa ka jingsynshar kaba khuid kaba suba. Ngi kwah ban pynmih ïa ka Meghalaya Model kaban sdang na Shillong North bad kiwei pat kin sa bud lang,” u la bynrap biang.
Ha kane ka jingïalang, u Dr. Aman u la ïathuh ruh ba kiwei ynda ki la ïohi ba ka UDP Shillong North ka la kiew bha ki la sdang pynjur ïa ka jingkawang ktieh pyrshah ïa ki. “Hynrei 2tarik ngin kynther lut ïa ka ktieh kaba rkhiang,” u la ong da kaba bynrap ba mynta ka Shillong North ka la sdang ban khihwin bad kumta ki don ka jingkyrmen ba ki nongshong shnong ka constituency kin mih paidbah ha ka 27tarik ban ai ka jingkyrshan ïa ka party.