Nga don ka jingshahniah ha ki paidbah namarba ngam ju pynkheiñ ïa ki kular: Adelbert Nongrum

0

Shillong, Rymphang, 14: “Nga don ka jingngeit, ka jingkyrmen bad ka jingshaniah ba ki paidbah kin ym pat iehnoh khamtam ba ngam pat ju pynkheiñ ïa ka kular, ngam pat ju kynran dien watla nga dei ban ïeng rangbah marwei ban kren ïa ki mat ki jingdonkam ym tang ha ka Konstitwensi bad ïa ka jylla bad ngam pat ju kynriah na ka nongrim bad ngam pat ju ïapeiñ bad ki mat ka jaitbynriew,” ong u Bah Adelbert Nongrum.
U Bah Adelbert Nongrum uba long ruh u MLA barim jong ka North Shillong Constituency u la bynrap da kaba ong, “Namar kane kadei ka ilekshon kaba san jong nga kynthup lang kum u MDC bad MLA, nga ngeit ki paidbah ki sngewthuh ba ka jingïakhun kam dei tang bad ki party hynrei na ka bynta ka pateng ba mynta bad kiba dangwan.”
“Kiei kiei kiba nga la dep kum ka jingpyrshang ki long tang kiba rit hynrei kiba dangsah kiba nga hap ban bteng ban pyrshang ki long kiei kiei kiba khraw na ka bynta ka lashai,” ong biang u Bah Adelbert Nongrum kyrtong ka VPP na North Shillong Konstitwensi.
U la ong ba halor ka jingrung jong u sha ka Voice of People Party ka long ba u ïohi ba ka don ka jingkyrmen, ka jingpyrshang ban pyndep ïa ki jingangnud ki paidbah. Ka jingïakhun kaba long ruh ka jingdonkam, lyngba ka jingrai jong uwei pa uwei uba la ïoh ka hok ban thep ïa ka vote, kumta ka jingkyrpad bad kyntu, khamtam ïa kito kiba la ïoh ïa ka hok ban thep ïa ki bad sngewbha ba kin leit thep vote naba ka shi vote jong ki ka long ka hok ban rai ïa ka lawei ka Ri.
“Sngewbha nga kyrpad ïa ki paidbah kin ym artatien ha kane ka kynti sngewbha ailad lem ïa ka VPP hapoh ka jingïalam u Bah Ardent, ngi kular wat la ki kyrtong na ka VPP ki ba bun kidei kiba thymmai bym pat ithuh, ngi kular skhem ba lada ka jingjop ka wan, u paidbah un shaniah ha ki, ngin pynithuh da ki kam sha ka Jylla bad sha kiwei pat ki Ri namar ïa ka VPP la pynkha na ka bynta ban wanrah ïa ka synshar khadar kaba khuid,” ong u Bah Adelbert.
Haba ïadei pat bad ka North Shillong Konstitwensi u Bah Adelbert u la ong ba ka jingïakhun kam pat dei eh bad ki para kyrtong hynrei bad ki dawbah kiba la ïaisah teng jong ka jaitbynriew bad ka jylla.
Haba kren shaphang ka Konstitwensi u la ong, “Kiba bun hi ki dangdei ki longïing ba duna ka ïoh ka kot namar kata ka daw ym dei ban beij ïa ka 5 ne 10 hajar, wat hapdeng ki 5 tylli ki snem kiba dap da ki jingïakhih kum ka mat Them Ïew Mawlong, CAB, CAA, ILP bad COVID-19.”
Haba ïadei bad ki thaiñ kiba dei bad kiba shong da kiwei ki jaitbynriew u la ong, “ka shong ha ka jingstad jong ki, hynrei nga dei u briew u ban nym pynbor lane khroh tang na ka daw ban shu jop ilekshon.”

Leave A Reply

Your email address will not be published.