Ai jingïarap ka HYC Shella ïa ki Khynnah Skul

0

Shillong, Rymphang 14: Ka Hynniewtrep Youths’ Council- Shella Area Unit (HYC-SAU) ha ka 13 tarik mynta u bnai, ka lah ïoh ban noh synniang da ki kopi ïa ki khynnah skul kiba pule naduh Class V haduh Class X ha ki skul kiba don hapoh ka Shnong Shella.
Ïa kane ka prokram lah ioh ban pynlong ha ïing Dorbar Kher Sohlap-Umdoh-Mawpot, Shella. Lyngba ka jingïarap na ki Kher kiba don ha ka Shnong Shella, lah ioh ban jied ia 5 Ngut ki khynnah pule na kawei pa kawei ka Kher katkum ka jingibit jong ki Nongialam Kher da kaba peit ïa ki longing kiba donkam bha ka jingïarap.
Ki Nongïalam bad ki dkhot ka Seng ha ka jingiadon ryngkat ki kmie ki kpa, ki lah ïoh ban sam jingiarap ia ki 45 ngut ki khynnah pule ka Shnong da ki kopi katkum ka jingdonkam ka jong ki bad katkum ka Class kaba ki pule.
Na ka liang ka Seng ka kyntu ïa kine ki khynnah pule napoh Shnong ba kidei ban minot thop ha ki jingpule ki jong ki bad ban nym ailad ïa ka jingduk ban long u diengpynkiang bad ban pynbor ïa ki ba kin pep skul noh shipor. Ka Seng ka ngeit ba lyngba kine ki jingai barit kan long kum ka jing kyrshan ïa ki khynnah pule bad ki kmie ki kpa ha kum kane ka por kaba hiran bad ka kular ruh ban namg iarap katba lah la i bor barit ha man ka khep ba ki khynnah pule napoh Shnong ne ki parashnong parathaw ki donkam ïa ka jingiarap na ka Seng. Ha kajuh ka por ka kitbok kitrwiang ruh ba kin nang kiew shaphrang ha ki jingpule ki jong ki bad kitbok ruh ïa ki kmie ki kpa ba kin biang ka kamai kajih khnang ba kin lah ban phah pule ïa la ki khun ki kti ha ki kyrdan kiba kham hajrong.

Leave A Reply

Your email address will not be published.