Shillong, Rymphang 06: U Kyrtong ka Voice of the People Party (VPP) na Pynthorumkhrah, u Bah Mayborn Lyngdoh, u la ong ba ka jingmih kynsan ki dur ha ki rynsan social media ban pyni ba hana u la rung sha ka BJP ka dei ka jingleh ki briew kiba u tip bha bad ong ba kane ka jingleh jong ki ka pynpaw shai ïa ka jingsngew kutlad namar ki la sngewthuh shai kdar ba kin ym lah ban ïakhun shuh ïa ka sur jong ka jingkwah jingkylla ki paidbah da kaba phai ban ai jingkyrshan sha ka VPP ban kyrshan ïa u kum u kyrtong ka party.
Haba kren sha ki lad pathai khubor hadien ba la dep thep kyrteng kum kyrtong ka party na katei ka Constituency u la ong ba um sngew phylla satia ïa katei ka jingmih ki jingkynthoh ki riew wad daw namar kane ka jingleh jong ki ka pynphalang shai kdar ïa ka jingsngew kutlad ba ki paidbah ki la phai khmat sha ka VPP ba kan pynlait ïa ka jingshahteh sha khum ha ki MLA bad ki nongmih khmat kiba la hikai ia u paidbah ban shnaih tylli tullon ha ki ha man ki khep jong ka jingim.
“Kaei kaba la phriang ha Social Media ka dei ïa kawei ka jingïalang ka BJP kaba ki la khot ïa nga kum u riew laitluid ban wan pynïaid jingïalang da kaba kin siew bainong pat bad nga leit ban pynïaid ïa katei ka jingïalang kaba la long ha Shella la kumba 10 bnai duna eiei bad nga leit beit thik kum u briew uba shah kot ban pynïaid jingïalang kum uba ki siew bainong bad lada phi peit bha ruh ba ngam shym la deng ïa uto u jyndeng ryndang uba baroh kiba wan shim bynta sha ka jingïalang ki deng,” u la ong.
U la ong ruh ba ha kine ki dur la pyni ba u rung BJP namar u ai khublei kti ïa u Bah AL Hek ha ka por ba u wan ai mysniem ha ka jingïakhih ki nonghikai ha khyrdop Secreteriat.
Haba kren halor ka Constituency u la ong ba ka jingsahdein ka Pynthorumkhrah ym lah ban len namar wat la ka dei ka constituency ba dei bha ban kiew namar wat ka New Shillong ka hap ha kane ka Constituency.
“Ka jingkyrduh um kaba jur bha ha kane ka constituency, ka jingbym don ki lad ban hikai ïa ki samla ban ïeng ha la ki kjat, ka jingbym ïarap bai seng bad kiba bun ki jingduna kiba ym lah jer bad nga ïohi ba ki nongmih khmat kim kwah hi ruh ban hikai ïa ki samla halor kane ka bynta namar ki kwah ba ki samla kin wanmih bad ki paidbah kin wan khrong beit sha ki bad ba kin shah teh kynjri da ka jingïarap jong ki bad ngi kum ka party ngi ïeng ban pyndkut ïa kine ki kynjri kiba la teh la kum ïa ngi,” u la ong.
