Nga shaniah ha ki paidbah bad halade ba ngan jop biang mynta ka kynti ruh : Bah Fantin
Thep kyrteng u kyrtong ka NPP na Laitumkhrah

Shillong, K’Lyngkot 27 : U kyrtong ka NPP na Laitumkhrah – Malki, Bah Fantin Joseph Lakadong ha ka sngi Nyngkong u la pyndep ïa ka jingthep kyrteng na bynta ka elekshon MDC kaban long ha ka 21tarik Rymphang mynta u snem.
Ha kane ka sngi thep kyrteng la synran lang da ka Kurim jong u ka Kong Ampareen Lyngdoh kaba dei ruh ka MLA bad Myntri ka Sorkar jylla, nangta ki bahaiing hasem, Secretary ka NPP, Bah K Nongrem bad ki nongïalam ka NPP na katei ka constituency nalor ki paidbah nongkyrshan.
Haba kren bad ki lad pathai khubor, u Bah Fantin u la pynpaw ïa ka jingsngewskhem ba ki paidbah nongthep vote ka Laitumkhrah – Malki kin ai biang ka jingshaniah kumba ki la ai ha ka elekshon MDC kaba la dep ha u snem 2019.
U la ïathuh ruh ba kum u Executive Member u la ïoh ban don bynta lang na ka bynta ban wanrah bad pynurlong bun tylli ki aiñ kiba ïadei na ka bynta ka bha ka miat jong ka Jaidbynriew.
“Kaei kaba nga thrang manga ka long ba ka Ktien Khasi jongngi kadei ban rung bad treikam pura noh ha baroh ki skul Lower Primary,” u la ong da kaba bynrap ba ki dang don bun ruh kiwei kiwei ki kam kiba kum ki nongmihkhmat sha KHADC ki hap ban buddien.
Ha kajuh ka por u la ïathuh ba um tip satia bad no un ïa khun pyrshah ha kane ka elekshon MDC. “Ngam ju tip bad ngam ju kylli mano ki kyrtong kiba nga hap ban ïakhun pyrshah namar nga pynleit jingmut beit tang ka lynti ïaid lajong naba nga shaniah ha ki paidbah ka constituency lajong,” u la bynrap shuh shuh.
Ha kajuh ka por u ong ba ka dei ka jingshisha ba kano kano ka party kaba don ha ka liang synshar ka shah kynthoh beit. Nangta u ong ruh ba um ïohi ba ka Party NPP ka leh sniew bad dei na kane ka daw u ïai neh bad u dang shaniah ban ïakhun ïa ka elekshon MDC na ka party kaba u don baroh shi katta.
Shuh shuh u ong ruh ba u ïoh ïa ka jingkyrshan na ka party bad na ka sorkar hapoh ka jingïalam jong u Myntri Rangbah bad ki Symbud Myntri Rangbah na ka bynta bun ki jingdonkam ha ka constituency.
Ha kawei ka liang u la ong ba baroh ki thrang ba ha ka elekshon MDC ban ïoh ïatrei lang bad u ne ka MLA kumta u sngew donbok naba ka MLA ka la dei lypa na iing la jong bad kane ka la dei lypa ka jingkyrkhu.
Katba na ka liang ka Kong Ampareen ka la ong ba u Bah Fantin shisien ba u la mih kum u kyrtong um dei shuh mynta tang u kurim hynrei kum u riew ïaleh. “Kumta kum ka kurim ngin ïa trei shitom lang ban ïoh ïa ka jingjop,” ka la ong.
Nangta ka ong ruh ba ka jingjied jongki ban thep kyrteng nyngkong eh ha kane ka sngi na baroh ki kyrtong ka long ban pyni ba ka party ka don ka jingshimkhia bad ka jingkitkhlieh ban trei.
Ïa kane ka jingthep kyrteng, u Bah Fantin u la pyndep ha ka jaka treikam jong ka Inter State Bus Terminus kaba don ha Mawiong kaba ka tnad Elekshon ka la pynbeit ba kan long ka jaka thep kyrteng na ka bynta kiba bun ki constituency khamtam kiba dei na ki bynta jong ka sor bad khap sor.