Pynkhreh ka jylla ban bei tyngka na ka bynta ban kyntiew ïa ka roi ka san, ong u Conrad

Shillong K’ Lyngkot 27: U Myntri Rangbah ka Jylla Meghalaya u Conrad K Sangma u la pynher ïa ka lama ri India ha Tura ban rakhe ïa ka Republic Day kaba 76 snem jong ka ri baroh kawei.
Ha ka jingkren jong u ha kane ka sngi u Myntri Rangbah ka Jylla u la batai ïa ka lynti ïaid jong ka Jylla ban kiew sha ka roi ka san kaba dangmih ki sngi.
Na ka liang jong u, u la kren ruh shaphang ka jingroi jingsan kaba ïaryngkat lang bad kaba la ai bad pyntrei sha ki bynta bapher bapher jong ka Jylla.
Haba kren shaphang ka thong ban kot 10 Billion Dollar Economy ha u snem 2028 da kaba pynkiew ar shah ïa ka GDP jong ka Jylla, u Conrad u la iathuh ba ka Jylla ka la pynkhreh ban pynurlong ïa ka thong bad ki jingbei tyngka kiba heh bha ki dang ïaid ha ki kam pynroi bapher bapher kiba donkam ha ka jylla.
“Ka GDP jong ka jylla jong ngi ka la kiew na ka T. 23,235 klur ha u FY15 sha ka T.53,057 klur ha u FY24. Ki bynta ba kongsan kiba kynthup kum ki surok, ki ïing ki sem, ka jingpynbiang um, ka bording, ka kam jngohkai pyrthei, bad ka IT ki pynlong ïa ka jingroi. Ha kine ki san snem ba la dep, ka jylla ka la shna palat 2,500 km ki surok hapoh ka PMGSY. Ka sorkar ka dang don ha ka jingthmu ban pynheh ïa ka kad Liengsuiñ jong ka Shillong khnang ban lah ban pdiang ïa ki Liengsuiñ kiba kham heh bad ban pynbha ïa ka jingpynïasoh,” ong u Conrad.
Halor ka jingpynbha ïa ki surok jong ka Jylla, u Conrad u ong, “Ha kine ki ar snem ba la dep, ka Sorkar ka la mynjur ïa ki jingtrei surok kiba kynthup haduh 568 km ban kyntiew ïa ki lad pynïasoh hapoh ka Jylla. Ka jingtrei halor ka surokbah ka Shillong-Dawki bad ka surok Tura- Dalu ka la ïaid shakhmat, bad la mynjur ïa ka lynti ïaid kaba thymmai na ka bynta ka surok Pynursla Bypass. Ki projek kum ka Shillong Western Bypass, bad ka surok kaba stet bha na Mawlyngkhung sha Panchgram ruh ki dang ïaid shakhmat,” u la pyntip.
U Conrad u la pyntip ruh ba lyngba ki projek externally aided project, ka Sorkar ka la pynroi ïa ki jingtei surok ha ka thaiñ kiba jrong haduh 500 km.
“Ka Surok Garobadha-Dalu, ka Surok Pasyih-Garampani, ka Surok Umling-Patharkhmah, bad ka Surok Umsning-Jagi, kaba thmu ban pynbha ïa ka jingpynïasoh surok ha baroh ki thaiñ jong ka Jylla. Da kaba pynshong nongrim ha ka jingtreikam bha jong ka Jylla ha ka liang ka surok, ka Sorkar India, dangshen ka la mynjur ïa ka Mega Project na ka bynta ban pynbha ïa ka surok da kaba bei tyngka 2500 klur tyngka. Hapoh kane ka projek yn shna palat 300 Km ki surok kiba lah ban ïakhun pyrshah ïa ka jingkylla ka suiñbneng kiba don ar lynti bad kane kan ïarap ban pynurlong ïa ka ‘Mission 10’ jong ngi,” bynrap u Myntri Rangbah ka jylla.