La 7 sngi kynthih ym pat lap ïa kiba pynïap ïa ka samla ha Wahriat, rit mynsiem kiba haïing

0

Nongstoiñ, K’lyngkot 27: Ka jingjia lap ïa ka metïap jong ka samla ha ka 20 tarik mynta u bnai, ïa kaba la suba jur ruh ba ka la shah pynïap ha ki riew sniew, ka dei ka jingjia kaba shyrkhei bad kaba pynher syrngiew ym tang ïa kiba haïing hasem hynrei ïa ka shnong ka thaw bad ka thaiñ. Hynrei, naduh katei ka sngi ba la jia haduh mynta la hynniew sngi kynthih, na ka liang kiba haïing kim pat ïoh jingtip ei ei mano ba leh ïa katei ka kam.
U nongthoh khubor haba ïakren bad u kpa lem bad ki khun jong katei ka ïing, ki la ïathuh ba kane ka khun kaba la suba jur ba ka la shah pynïap ka dei ka samla kaba la tip kyrteng kum ka Lilyioris Wahlang 21 snem ka karta. Ka dei ka khun kaba phra napdeng ki 11 ngut shi para bad ka dei ka khun kynthei kaba 6 jong u Bah Dhansingh Lyngdoh Nonglait bad ka kong Wentina Wahlang, kiba shong ba sah ha dong Mawbyrshem jong ka shnong New Nongstoiñ.
Katkum ka jingïathuh jong u kpa bad ki hymmen jong ka, la ong ba ha katei ka sngi 20 tarik ka la mih na ïing ha ka por 7 baje mynstep khlem wan phai ïing shuh. U kpa ha ka jinglyngngoh namar ka dei ka samla ka bym ju kham mih na ïing, u la leit wad kylleng ki jaka baroh shi sngi. Hynrei hapdeng ka jingwad ha ki bynta ka Wahriat marjan bad ka jaka ba thmu pynlong jaka ot doh, u la lap shwa ïa ki jaiñ jong ka.
Hadien ba u la lap ïa ki jaiñ u la hiar shuh shuh kham sharum ryngkat ka jingpyntip sha ki bor pulit, ha kaba ki pulit jong ka Fire and Emergency Service ki la ïa poi bad ïa wad lang harum ka Wahriat. Ha ka jingwad kaba la neh kham slem, ha ka por 4:30 ei ei janmiet ki la lap ïa ka metïap jong ka samla kaba la thiah lyngktar ha katei ka jaka. Na ka liang ki pulit ruh ki la shim kam halor kane ka jingjia katkum ka aiñ.
Halor kane ka jingjia ba sangsot ïa kane ka samla, kiba haïing hasem ki la kren shai ba ki suba jur ba ki la don ki briew kiba la leh ïa kane ka kam pyrshah ïa ka, katkum ki dak ki shin ba ki la lap.
Na ka liang ka hynmen jong ka samla ba la khlad noh, ka la pynpaw ba kiba haïing hasem kim ngeit satia ba kane ka khynnah kan leh hi ïa kane ka kam. Ka dei ka khynnah kaba la don ka jingnang jingstad jingsngewthuh bad dang shu pyndep ruh ïa ka Class XII Science bad kaba shi sur. Namar kata ka ïing ka sem hi ka shaiong ngaiñ bad ym sngew lah satia ban pdiang ïa kane ka jingjia kaba la jia ïa ka khun jong ki wat haduh kane ka khyllipmat ruh.
Namar kata na ka liang ka ïing ka sem baroh kawei, ka kyntu bad kyrpad rit ïa ka Police Department, ban shimkhia ïa kane ka kam bad ban thwet haduh ban da ïoh kem bad ban pynshitom da kaba eh ïa ki briew kiba donkti ban pynïap noh ïa ka samla Lilyioris Wahlang.
Ha kajuh ka por ki kyntu sha ki kynhun sengbhalang kiba ju peit ïa ka khia ka shon ha ka dong ka thaiñ, ba kin shimkhia lem halor kane ka jingjia ïa ka ïing ka sem jong ki, khnang ban ïoh ïa ka hok bad ka jingshisha na ka bynta kane ka samla kaba la khlad noh.

Leave A Reply

Your email address will not be published.