Nga kwah ba ka South West Khasi Hills District kan dei kawei na ki ‘Tourist Destination’, Renikton

Mawkyrwat, ‘Naitung 26: U bah Renikton Lyngdoh Tongkhar, MLA ka Mawkyrwat Constituency bad uba dei ruh kum u Nongaibuid hapoh ka tnad Social Welfare jong ka Sorkar Meghalaya mynta ka sngi u la leit ban jurip ïa ka jingshna ïa kawei na ki jaka jngohkai pyngngad kaba don ha Shnong Mawten, South West Khasi Hills District ka ‘Synrang Mawrin’.
Lah ban kdew ba ïa kane ka jaka jngohkai ka ‘Synrang Mawrin’ haduh mynta la shna lyngba ka jingïatreilang jong ka shnong Mawten bad kumjuh ruh na ka tnad jong ka Sorkar lyngba ka ophis jong u Block Development Office kaba dei na ka skhim 100 sngi ne ka MGNREGA ha kaba ka jinglut ha kane ka la kot mynta haduh 1 klur 20 lak ei ei ha kaba watla kane ka jingshna kam pat da long janai bha.
Lah ban ong ruh ba kane ka jingleit jurip jong u nongmihkhmat ka long kawei na ki lad ba ma u ryngkat u Myntri jong ka tnad jngohkai jong ka Sorkar Meghalaya kin sa thaw ki lad ki lynti ban ïoh ban pyndep noh ha ka por kaba biang khnang ba yn lah ban plie paidbah noh kumba la buh ha ka 4 tarik u ‘Nailur, 2023.
U bah Renikton Lyngdoh Tongkhar haba kren ha ki lad pathai khubor u la pynpaw ka jingaikhublei na ka bynta ki rangbah jong ka shnong naduh u Myntri Shnong kiba la buh ïa kane ka sngi ba kin ïoh ban jurip ïa kane ka Synrang Mawrin kaba la sdang ban shna pynwan dur itynnad khnang ba ki briew na kylleng ki jaka kin ïoh ban wan kai ne bam lyer pyngngad ha kane ka jaka. U la ong ruh ba watla ka la don ka jingsdang hynrei kane ka jaka ka dang donkam shubun ki jingpynlut khnang ba yn lah ban pynwan dur ha ka rukom kaba dei katkum ka jingthmu ba la buh.
“Nga don ka jingthrang ban pynkylla dur ïa la ka jong ka Mawkyrwat konstitwensi, bad ïa ka South West Khasi Hills District baroh kawei ba kan dei ka ‘Tourist Destination”, ong u bah Renik bad ïa kane lah ban pynurlong da ka jingïatreilang jong ki paidbah nongshong shnong, ki khun samla khnang ba kan long ka jingïarap ban ai ki lad jingkamai bapher bapher.
Ha kawei pat ka liang u la ong ruh ym tang ka shnong bad ka ophis u BDO kin ïa don bynta ha kane ka jingshna ïa kane ka jaka jngohkai, hynrei u don ka jingkyrmen ba kiwei de ki tnad treikam jong ka sorkar kin sa ai ka kti kamon ka kti kadiang kumno ban pynwan dur ïa kane ka jaka ha ka dur kaba itynnad namar kane ka dei kawei na ki jaka jngohkai kaba don kham hajan haba ïa nujor bad kiwei de ki jaka jngohkai. U la ong ruh ba shwa kata ka sngi ba la pynbeit ban plie paidbah, u bah Renik u kwah ba ïa kane ka jaka jngohkai yn sa lah ban shna pyndep lut kat ïa ki jaka ba dang sah bad ïa kane ka donkam ïa ka jingïatreilang na baroh ki liang.
Katba na ka liang u bah L. Lyngdoh, Myntri jong ka Shnong Mawten pat u la ong ba kane ka sngi jong ka jingwan jurip jong u bah Renikton Lyngdoh Tongkhar ka dei hadien ka jingkyrpad jong ka shnong namar lyngba ka jingwan jurip jong u un ïohi ïa ki jingbym pat lah ban pyndep jong ka shnong ryngkat ka Tourism Committee. “Nga kyrpad ïa u nongmihkhmat hadien kane un sa thaw ki lad ki lynti kumno ban leh khnang ba yn lah ban pyndep noh kham kloi ïa ka jingshna ïa kane ka jaka jngohkai namar ha ka 4 tarik u ‘Nailur, 2023 yn sa ïoh ban plie paidbah noh”, ong u bah Lyngdoh.
Shuh shuh u la ïathuh ruh ba kane ka jingleit jurip na ka liang u nongmihkhmat ha ka jinglam khmat jong u Myntri Shnong ki la ïoh ruh ban rung lyngba ki 5 tylli ki krem kata ka Synrang Set Masei, ka Synrang Bah, ka Synrang Hap Myrsiang, ka Synrang Lieh bad ka Synrang Mawrin.
Ha kane ka sngi la ïadonlang naduh u Block Development Officer (BDO), Mawkyrwat C&RD Block, u bah I. Lawryniang, MCS, u Sub Divisional Office (SDO) ka PWD (R), Mawkyrwat Division, u bah S.I. Lasso, u Myntri Shnong Mawten, u bah L. Lyngdoh, ki dkhot ka Tourism Committee bad kiwei de ki riew rangbah jong ka shnong Mawten.