La palat ka jingthut ka bording ha New Shillong Township ong ka KSU ha u Myntri Bording

Shillong, Naitung 26 : Ka KSU Shillong Mihngi ha ka sngi Balang ka la leit ban ujor sha u Myntri ka tnad Bording, AT Mondal halor ka jingthut thut khah khah palat ka jingpynlip bording ha katei ka thaiñ.
Ka Seng hapoh ka jingïalam jong u samla Hamar Wanshong, dkhot jong ka Legal Cell KSU Seng Kmie, ki la pyntip ruh ha u Myntri ba nalor ka jingthut ka rukom ïoh bording, ki paidbah ki mad ruh ïa ka bording kaba tlot bha.
Ha katei ka jingkynduh ka Seng ka la dawa ruh na u Myntri ban thung khambun ki nongtrei lane ki Line-man ha New Shillong Township ban peit haba ïadei bad ka jingthut khah khah ka bording.
“Ka jingduh bording hapoh ka thain New Shillong Township ka long sha ba palat bad teng teng ka thain kam ju ïoh bording haduh 24-48 kynta bad kane kala kthah bha ïaki paidbah naduh ki samla pule bad khmatam kito kiba pyntyllun ïa ki kam ki jam lyngba ka bording,” ong utei u nongïalam ka KSU.
U samla Hamar ula ïathuh ba haduh mynta ka thain New Shillong Township ka don tang uwei u Line-man u ba treikam na NEIGRIHMS bad u khmih ïa ki bun tylli ki shnong ba kynthup ka shnong Lumkhyriem, Mawpat, Itshyrwat, Saisiej, Mawlong, Mawkynring, Mawkasiang, Diengiong, Siejiong, Tynring, Mawpdang, Diengpasoh, Mynriang nalor kiwei kiwei.
La ïathuh ba ha ka jingïakren u Myntri u la kular ban shimkhia ïa katei ka mat bad shen un sa kren bad ki ophisar ka tnad Bording ban pyntikna ba katei ka thaiñ kan ym thut shuh ha ka jingïoh bording.