Lada ka Entry Tax Gate ka KAAC ka dang don ha Khanduli yn mih ka jingjia kum ha Mukroh:HBDRF

Shillong, Naitung, 26: Ka Hynñiewtrep Border Dispute Redressal Forum (HBDRF) ha ka sngi Balang ka la maham ba lada ka Sorkar Jylla kam lah ban weng noh ïa ka Entry Gate jong ka Karbi Anglong Autonomous Council (KAAC) kaba don ha ka shnong Khanduli, khlempep kan mih biang ka jingjia kumba la jia ha ka shnong Mukroh.
Ha ka jingïakren bad ki lad pathai khubor, u Chairman ka Forum u Bah Chandame Sungoh u la ong, “lada ka Enty Tax Gate jong ka Karbi Anglong Autnomous Council (KAAC) ka dang neh dang sah ha ka shnong Khanduli, kan jia biang kumba la jia ha Mukroh.
Haba pynshai halor ka jingkren jong u dang shen ha kawei na ki lad pathai khubor lada ki Karbi kim hun ban shong ban sah ha Meghalaya ki lah ban leit phai noh sha Asssam, u Bah Sungoh u la ong, “ngi long ki trai shnong trai muluk kiba shong nyngkong eh ha kane ka jaka. Ki briew jong ngi ki shah pyndik lait phew jait ha kine ki briew (Karbi) nalor ba ki shong ki sah hapoh ka khyndew ka shyiap jong ngi. Ngi ladep ïakren la bun bunsien bad u Deputy Commisioner jong ka West Jaiñtia Hills District. Ngi la ai bun tylli ki dorkhas. Ngi la ïakynduh ruh wat ïa u Chief Secretary jong ka Jylla ha ka 3 tarik, Jymmang, 2023 bad ngi la ïathuh lut ploiñ ïa ki jingjia hynrei kim shym la shimkhia ïa ki jingeh.”
“Ka jingïakynad, ka ladep jia. Namarkata, ka Forum ka ïaiban ïa ka Sorkar ban shimkhia ban pynneh pynsah bad ban wanrah biang ïa ka shongsuk shongsaiñ bad kumba ngi la ïoh jingtip ba ki Myntri Rangbah ka Meghalaya bad ka Jylla Assam kin sa leit jurip ha ka 15 tarik mynta u bnai hynrei kane ka jingjurip kam pat urlong satia haduh mynta wat haba ladep shna wat ïa ka rynsan,” u la ong.
“Hadien ba la mih ka jingïakynad ki Pnar bad ki Karbi, ki arngut ki Myntri Rangbah (Conrad Sangma bad Himanta Biswa Sarma) la arsien ki ladep ïakynduh bad la saw sien ki Symbud Myntri Rangbah, ki DC bad ki SP jong ka West Karbi Anglong bad ka West Jaiñtia Hills ki ladep ïakynduh. Hynrei kim shym la shimkhia da ka rukom kaba dei,” la bynrap u Bah Sungoh.
“Ki Khasi-Pnar ki im da ka rep ka riang bad ki mar rep jong ki kim ïaid iew sha Assam hynrei la pynïaid iew tang ha Meghalaya. Ki briew nalor ba ki long kiba duk, ki shahniah na ki mar rep ba la die ban ïoh pisa ban thied jingbam. Naduh ba la khang ïa ki iew ki hat, ki briew jong ngi kim ïoh shuh ban leit die ïa ki mar rep ban bujli thied ïa ki marbam. Wat ha ka pang ka shitom ki Karbi ki khang lynti ïa ki briew jong ngi ban leit wad jingsumar na West Jaiñtia Hills hynrei la phah pynban Karbi Anglong, sha Hamren, sha Diphu kaba wat tang ka ktien ka thylliej ruh kim sngewthuh ban ïakren,” la ïathuh u Bah Sungoh.
“Lajan dap lai bnai pura ka jingïakynad ki Khasi-Pnar bad ki Karbi. Lada ka Sorkar Meghalaya bad ka Sorkar Assam kim shim khia ban wanrah ïa ka shongsuk shongsaiñ mardor, ngim banse ban thoh sha ka Meghalaya Human Rights Commission (MHRC),” u la ong.