Jowai: U MLA jong ka Jowai Constituency u Bah Wailadmiki Shylla ha ka sngi ba-ar u la sam ïa ki tiar pyndonkam ki nongrep (Agri-Tools and farm machineries) sha ki 12 tylli ki Integrated Village Co-operative Societies (IVCSs) kiba don ha Thaidlasken bad Amlarem Block ha ka jingïalang kaba la pynlong ha Tyrshi Inn, Khliehtyrshi.
Ïa kane ka program la pynïaid da ka District Project Management Unit, West Jaiñtia Hills District.
Haba ai jingkren ha kane ka sngi u ma Wailadmi Shylla ula ong ba ka long kaba donkam bha ban don ka jingïatreilang hapdeng ki tnat sorkar, ka IVCS bad ki nongrep hapoh kine ki Block khnang ba yn lah ban kyntiew shaphrang ïa ka ïoh ka kot jong ki nongrep. U la ai mynsiem ïa ki nongrep ban kin peit ïa ka kam rep kum ka lad pynïohkam pynïoh jam bad ula kyntu ruh ïa ki ba ki dei ban pynmlien lem ïa ki khun ki kti jong ki ha ki kam rep.
Shuh shuh u ma Shylla ula ai jingmut ïa ka kynhun jong ka DPMU ba kin pynlong ïa kum kine ki prokram ha ki jaka paidbah kum ha ki ïew ki hat na ka bynta ban khring ïa shibun ki nongrep. U la pyntip ruh ba ula don ka jingthmu ban don ka jingïakynduh lang hapdeng u Deputy Chief Minister ma S. Dhar, u DC bad ki tnat ba dei peit ïa ka rep ka riang ryngkat ki nongrep na ka bynta ban ïasyllok ïa ka ka jingdonkam ban pynbha shuh shuh ïa ka rep ka riang.
Kiwei de kiba la ai jingkren ha kane ka sngi ki long u Deputy Commissioner ka West Jaiñtia Hills District u bah B.S. Sohliya, IAS, u ma A. Suting Deputy Project Director, M-LAMP, u ma M. Lamare, Assistant District Agriculture, kong E.Buam, Deputy Manager, DPMU bad u bah S. Rani, District Horticulture Officer.
Kham hashwa la ïoh ïa ka jingkren pdiang da u bah S.Lyngdoh, DPM, DPMU bad ïa ka jingïalang la pynïaid da u bah Starwell Paduna, Deputy Manager, DPMU bad ka kong M. Syngkon, Assistant Manager, DPMU, ka la ai ïa ki kyntien ai khublei.
