Shillong, Rymphang 20 : U MLA ba rim ka Mawlai uba long ruh u kyrtong ka UDP na katei hi ka constituency u bah P.T Sawkmie u la pynpaw ka jingsngew kmen kaba khraw ba ka UDP ka buh ïa ka ILP hakhmat duh namar kane ka aiñ ka long kum ka stieh ban ïada ïa ka ri bad ka jaidbynriew na ka jingshah tyllep ha kiwei ki jaidbynriew.
U la kren ïakane ha ka jingïalang paidbah kaba la long ha Mawlai Mawdatbaki. U la ong kane ka dei ka aiñ kaba baroh 60 ngut ki MLA ki la ïa mynjur lang hapoh ka ïing dorbar thawaiñ ka jylla da ka Resolution kaba la phah ruh sha ka sorkar pdeng, hynrei ka sorkar hapoh ka jingïalam jong u Conrad Sangma kum u Myntri Rangbah bad nongïalam ka NPP u khlem shim khia ban bud dien ïa kane bad na kata ka daw ka ILP kam pat treikam haduh mynta ha ka jylla Meghalaya. Wat haba u Myntri Rangbah duh u Narendra Modi bad u Myntri kam pohïing ka ri u Amit Shah ki wan poi ha nongbah Shillong u Conrad u khlem shim khia ban ïalam ïa ki MLA ban ïakren bad u Modi ban pyntreikam ïa katei ka aiñ.
U la ong “ Lada ki paidbah ki jied ïa ka UDP ban wan ha ka bor ngin ïai bud dien ïa kane ka kam tad haduh ban da ïoh ban pyntreikam ïa ka ILP ha kane ka jylla. Namar ngi donkam ïa kane ka aiñ ka ban khanglad ïakiwei ki jaidbynriew kiba na kiwei ki ri ba marjan kum ka Bangladesh bad Nepal ban ym ïoh wan rung kyrthep sha ka ri, ym dei satia na ka bynta ki nong India. Namar ym lah ban len ha Mawlai kaba dei ka dong paka ki trai ri trai muluk ne jong ki khun Khasi Khara kiwei ki jaidbynriew ki dang shlan ban wan rung bad buhai shnong hynrei ha kiwei kiwei ki dong bad shnong hapoh ka jylla khamtam ha kane ka nongbah Shillong la ïohi ba kiwei ki jaidbynriew ne ki mynder ki la wan ban buhai shnong beaiñ. Ha Mawlai namar ba khlaiñ ki Dorbar Shnong bad ki paidbah ym don ba nud ban wan buhai shnong hynrei ha kiwei ki dong la bun kiba wan buhai shnong beaiñ kumta ngi donkam ïa kane ka aiñ ban treikam ha kane ka jylla namar dei tang kane kaba long ka stieh ban ïada ia ka jaidbynriew ba ieit jong ngi”.
Ha kane ka sngi u la kyntu ïaki paidbah da ka mynsiem ba sngewrit ba kin jied ïa ka UDP bad shon ha ka dur jongka Bom ha ka 27 tarik khnang ba ha ka 2 tarik Lber un long biang u nongmihkhmat jong ki paidbah ka Mawlai Constituency namar u la kular ruh ba un dang ïai bud dien bad trei shuh shuh arshah bad laishah ban kyntiew bad wanrah ïaka roi ka par bad jingkiew shaphrang jongka Mawlai Constituency nalor ki kam kiba u la trei bad shakri ïaki paidbah. U kular da ka jingïarap bad kyrshan bor jong U Blei ba un dang lah ban ai ka jingshakri hok ïakiba duk ba rangli hapoh ka Constituency hi baroh kawei.
