Shillong, Rymphang 20 : U Nongïalam ka seng Congress u Gaurav Gogoi ula khyrwit tyngeh ïa u Myntri Rangbah ka Assam u Himanta Biswa Sarma halor ka jingthet kti ba dei ma u uba pynwan dur ïa ka sorkar Meghalaya Democratic Alliance (MDA) bad ba ka BJP ruh kadei kaba don bynta naduh ba sdang haduh ban da kut ha ki jingkynnoh kam bamsap ha kane ka Sorkar.
“Baroh ki tip, kumno la thaw ïa ka sorkar ha Meghalya ha kaba ka BJP kala don ïa ka bynta kaba khraw bad baroh ki tip ïa ka jingïadei kaba ïajan hapdeng u Himanta Biswa Sarma bad u Conrad Sangma bad kumno la pynlong ïa u (Conrad) kum u Myntri Rangbah ka Meghalaya. Mynta u Sarma um lah ban thetkti ïalade ba ka BJP kam don bynta lang bad ka sorkar MDA” ong u Gogoi haba ïakren bad ki nongthoh khubor hynne ka sngi.
Une u nongïalam ka seng Congress ula ong, ba ka BJP kam lah ban kynnoh thik tang ïaka seng NPP halor ka jingbym larkam ka sorkar MDA ban ai jingshakri ïa u paidbah ka Meghalaya namar ka BJP kala don bynta ha kaban thaw ïa ka sorkar MDA bad Ar ngut ki MLA ka BJP kiba kynthup ïa u Bah Sanbor Shullai bad u Bah AL Hek kila bat kum ki Myntri Sorkar. Ula ong ba ka BJP kadei ban sangeh shi syndon ïaka jingleh drama ban ïalam bakla ïa ki paidbah ka jylla Meghalaya.
Ula ong, ka seng NPP, BJP bad kiwei pat ki seng kiba don haka sorkar MDA kidei kiba donkti lang ha ki kam bamsap naduh ka jingkhyllem ka Dome jongka Assembly, ka jingbam sap naka khlam COVID-19, ka jingbamsap Saubhagya Scheme, bad kiwei kiwei bad baroh kitei ki seng saiñ pyrthei kiba don lang bad ka sorkar MDA kidei kiba ïatreilang ha ki kam bamsap.
U Gogoi ula ong, ba u Myntri Kam Pohïing ka ri u Amit Shah ha ki snem kiba la dep, ula kam ha ki jingïalang ha Delhi, ba ka BJP kala knieh ïa u lakam synshar na ka Congress ha ka jylla Meghalaya bad ïa ka sorkar kaba thymmai ha Meghalaya la thaw da ka BJP, hynrei mynta haba ka elekshon kala jan une ujuh u briew ula kam pat ba ki kam bamsap kiba jia ha ka sorkar Meghalaya kadei kaba la ïalam da ka seng NPP bad kren kumba ka BJP kam don lang ha ka sorkar MDA ha ki kam ban lute na ki paidbah ka jylla.
Ula ong, ka BJP kala shu pyndonkam ïa u Conrad K Sangma ha kine ki san snem kiba la leit bad mynta haba kam donkam shuh ïa u, kala bret noh ïa u sharud.
Ula ong, ki paidbah kila tip lut ïa kiei kiei baroh bad kin sa ai ïaka jubab kaba paka haka elekshon MLA ïa ki seng saiñ pyrthei kiba don haka sorkar MDA. Ula ong ba ki paidbah ka Meghalaya ki kwah ba ïaka sorkar jylla dei ban pynïaid na Shillong ym na Dispur da u Himanta Biswa Sarma uba shah pynïaid kylla ha u Myntri Kam Pohiing ka ri u Amit Shah uba don ha Delhi.
