Kynnoh u Gaurav Gogoi ba ai kontrak ka BJP ïa ka North East sha u Himanta Bisa Sarma

Shillong, Rymphang, 20: U MP ka seng Congress u Gaurav Gogoi ha ka Lah Sngi U Blei u la kynnoh ba ka Bharatiya Janata Party (BJP) ka la ai kontrak ïa ka thaiñ Shatei Lammihngi baroh kawei sha u Himanta Biswa Sarma khnang ban dup ïoh jingmyntoi na baroh ki kynhun (syndicate) bad ki Mafia jong kane ka thaiñ.
U la kynnoh ba ka ka BJP bad ka All India Trinamool Congress (AITC) ki la peitkhmat bha ïa u dewïong ha Meghalaya.
Ha ka jingïakren bad ki lad pathai khubor, u Gogoi u la ong ba u don ka jingartatien ba ka BJP kan dang jop biang ïa ki ar tylli ki Seat haba kynthoh ïa ka jingkam jong u Sarma ba ha kane ka kynti u Myntri Rangbah un dei na ka BJP.
“Kaba ar, ka BJP hapoh ka jingïalam jong u Myntri ka tnat Kam Pohing u Amit Shah ka la ai kontrak ïa ka North East sha u Himanta Biswa Sarma namarba lyngba jong u ki ïoh lut baroh ki kynhun bad ki ïoh bat ïa ki Mafia ha North East bad ïa ki snar khaii dewïong be-aiñ,” u la kynnoh.
“Namarkata, lada ka BJP ka wan ha ka por, u Myntri Rangbah un ym shong ha Shillong. U lah ban long u Myntri Rangbah tang ha ka kyrteng hynrei baroh ki rai yn sa shim na Dispur. Kane kaba ngi dei ban kiar bad ngin ïakhun na ka bynta ka jingsarong bad ka burom jong ki paidbah ka Meghalaya bad na ka bynta ka saiñpyrthei Meghalaya ïa kaba yn sa rai hi da ki paidbah jong ka Meghalaya,” la bynrap u Gogoi.
Haba kynnoh ba ka BJP bad ka TMC ki la phaikhmat bha sha u dewïong ha Meghalaya, u MP u la ong, “ka BJP ka kwah ban die sha u Adani bad ka TMC ka ktah ban ïoh jingmyntoi sop sop kaba kin ïoh na kine ki kynhun (syndicate).”
Shuh shuh, u Gogoi u la kynnoh ba ka TMC ka kwah ban pynjari ïa ka ‘cut money system’ ha Meghalaya.
“Ka Myntri Rangbah jong ka West Bengal dalade ka la mynjur ïa ka ‘cut money’ ha West Bengal ha kaba ki paidkar ha ka jaka ban ïoh jingmyntoi na ki skhim sorkar nyngkong eh kin hap ban siew shwa ïa ka pisa sha ki nongtrei jong ka TMC. Kane ka dei kata ka ‘cut money’ lane ka pisa bai rneng,” u la ong.
“Da ki hajar ngut ki paidbah ki la shah shukor. Ki la ai ïa ka pisa da ka jingkyrmen ba kin ïoh biang ïa ki jingmyntoi hynrei kim ïoh bad ka Myntri Rangbah jong ka Jylla West Bengal dalade ruh ka la kubur ba ka party ka shim bai rneng. Kane ka dei kaba kin sa leh ha Meghalaya,” u la ong.
U la ong ba ki nongïalam ba hakhmat jong ka TMC ki dei kiba donkti ha ka bamsap khaii dewïong be-aiñ bad ki Coal Mafia ha West Bengal da kaba bynrap, “mynta ki kwah ban knieh lut baroh, ban rahbor ïa u dewïong bad ïa ki marpohkhyndew.”