Kulmar ka synshar khadar ba wan tynruh jubor ki nongkhaïi sha ka saiñ pyrthei : Paul

Shillong, Rymphang 20 : U bah Paul Lyngdoh kyrtong ka UDP na ka 18- West Shillong Constituency haba kren ha rynsan ïa pyni nia paidbah jong ki kyrtong kane ka constituency ha ka 18 tarik ba la pynlong da ka Dorbar Shnong Lumdiengjri u la ong ba U Blei u don ka jingthmu na ka bynta iwei pa iwei hynrei ka wan ka jingkulmar naduh tynrai shaduh khlieh lada kiba don sap ha ka khaïi ( business) ki wan ban tynruh lamwir pynban sha ka saiñpyrthei ( politics). Kaba u mut ka long ba kulmar lut ka synshar khadar haba wan tynruh lamwir kiba don sap ha ka kham khaïi sha ka kam saiñ pyrthei.
Na kata ka daw haba kren ha katei ka rynsan u la ban jur ïa ki paidbah “Haba phi leit ban shon ïa ka vote ha ka 27 tarik, wat ym jied tang ïa u nongmihkhmat hynrei ïa u nongsaiñ dur, u nongthaw aiñ bad ïa u ban trei shitom na ka bynta ka lawei ka jong phi.”
ïa kane ka rynsan ïa pyni nia paidbah jong ki kyrtong ka West Shillong Constituency la pynlong da ka Dorbar Shnong Lumdiengjri da ka jingthmu ban ailad ïa ki kyrtong ba kin pynshai ïa ki mat treikam bad nongrim ha kaba ma ki bad ka seng jongki ki ïeng.ïa kane la pynlong ha Lumdiengjri Community Hall, bad u Bah Paul Lyngdoh (United Democratic Party) u lah pynkynmaw ïa ki paidbah ba dei haba u dang long MLA ma u hi ba la pynurlong ïa ka jingtei jong katei kajuh ka hall.
U Bah Paul u thrang ban wanrah ïa ka Meghalaya kaba long ‘HEALTHY’ ne kaba shait, kaba khlaiñ bad kaba dap pura. Da kaba shim ïa kane ka kyntien HEALTHY, u thmu ban nang pynbha khamtam ïa katto katne ki bynta kiba kongsan bha ha ka jylla. U la ong :
H-ealthcare (Ka Jingkoit-jingkhiah), E-ducation (Ka Pule-puthi), A-griculture & allied sectors (Ka Rep ka riang), L-aw & Order (Ka Shongsuk-shongsaiñ), T-ourism & H-ospitality (ka Jingwan jngohkai pyrthei), Y-outh Empowerment (Ka Jinkyntiew ïa ki samla).
U Bah Paul u ïawer ïa ki paidbah ban pyndonkam ïa ki san tylli ki ‘E’ kiba u don – Education (Ka Jingnang Jingstad), Experience (Ka Jingïaw Jingmut jingpyrkhat na ka jingïaid lyngba), Energy (Ka Jingshitrhem), Empathy (Ka Jingsngewlem) bad Ethics (Ka Akor ka burom). U Bah Paul Lyngdoh u lah dep ïa ka M.A. English na NEHU, u lah pyntbit ïalade ha ka Law (Jingpule Ain) bad u long ruh uwei na ki nongpykhat bad nongthohkot uba tbit tam ha ka jylla jong ngi. U don ka ‘experience’ kaba ïar kum u nongïalam. Kane ka kynthup ïa ki shiphew snem ha ka Khasi Students’ Union kum u President, lai samoi ha Assembly, ar sien kum u Myntri Sorbar, bad san snem ha ka KHADC. U Bah Paul u bynrap ba u lah ruh ban shah shkor bad ban sngewthuh ïa ki jingshem jingeh jong ki paidbah bad u pynthikna ba un ïaidon ha syndah jong ki.