Shillong, Rymphang, 20: San ngut ki nongkyrshan jong ka Trinamool Congress kiba dang thmu ban leit sha ka jingïalang ïalap elekshon ha ka shnong Adokgre, ki la duhei ïa la ka jong ka jingim hadien ka kali Pickup Van kaba kit ïa ki, ka la kylla khongpong ha shiteng lynti ha ka Lah Sngi U Blei.
Napdeng kine kiba ïap, san ngut ki dei ki kynthei bad kiwei pat ki la mynsaw jur haba kane ka kali ka la kylla khongpong ynda poi ha Bolmedang hajan Kharkutta, East Garo Hills ha ka por kumba 11:00 baje mynstep.
Ka kynhun ki nongai jingïarap ki la poi marmar sha kane jaka bad pynkit noh ïa kiba la mynsaw sha ka jaka ai jingsumar kaba hajan.
Saw ngut napdeng kiba la khladnoh la ithuh kyrteng kum ka Merina Sangma, ka Sabina Marak, ka Kukila Momin bad Tesa Sangma.
Na ka liang jong ki nongïalam ka Meghalaya TMC ki la pynlong ka jingïalang sngewlem halor kane ka jingjia haba ïathuh ïa ka khubor kaba sngewsih ha ka jingïalang ba la ïashim bynta da ki phew spah ngut ki paidbah ha Kharkutta ha kane kajuh ka sngi.
U kyrtong ka TMC na Kharkutta, u MDC u Cherak W. Momin, u nongïalam jong ka Trinamool Congress Legislature Party Leader u Dr. Mukul Sangma lem bad kiwei kiwei pat ki nongïalam ki la ai jingkren sha ki paidbah ha ka jingïalang ha Chenanggre Stadium, Adokgre.
Ha kane ka jingïalang, ki la pynlong ïa ka jingsngap jar kaba shipor bad ka jingduwai na ka bynta ki mynsiem kiba la khladnoh.
Haba kren sha ki paidbah ha kane ka jingïalang, u kyrtong ka Meghalaya TMC na Kharkutta u la ong, “ki Kmie baieid bad ki paralok jong nga baroh, haduh sa ngut ki mynsiem briew ki la leit noh na kane ka sla pyrthei katba ki dang thmu ban wan sha kane ka jingïalang hynrei na ka jingjia ba sngewsih, kim shym la lah shuh ban ïadonlang bad ngi ha kane ka khyllipmat. Nga phah ïa u kyrwoh sngewlem sha ki bahaing hasem. Nga kyrpad ïa iwei pa iwei ba kin kynmaw lem ïa ka iing ka sem jong kine ki lanot ha ki jingduwai..”
“Paralok ngam kwah ban kren bun kyntien mynta ka sngi, hynrei ka jingkyrpad jong nga ka long sha manla iwei pa iwei ba kin long kiba khlaiñ, ban bud ïa ki dienjat jong ki nongïalam jong ngi kiba la ai mynsiem ïa ngi,” ong u Cherak.
