Shillong, Rymphang 20 : U National President ka National People’s Party (NPP) bad Myntri Rangbah ka jylla u Conrad K Sangma ula kyntait ïa ka jingkynnoh jong ka BJP hba u don bynta ki bor pynïaid Disrtrict ka West Garo Hills ban ai jingbit ïa ka BJP ba kan pynlong ïa ka rally elekshon ha PA Sangma Sports Complex, Tura, ka ban wan ïashimbynta da u Myntri Rangbah Duh ka Ri, u Narendra Modi.
Haba pynpaw ba um don bynta eiei ruh em halor ka jingkyntait ban ai jingbit ïa ka rally u Myntri Rangbah Duh, ula ong ba ïa ki jingbit ban pynlong ïa baroh ki rally la ai da ka Election Commission of India (ECI) bad ka bor synshar District ka la shu pyntreikam ïa ki jingbthah jong ka ECI.
“Baroh ki jingbit ki wan na ka liang ka Election Commission of India bad haba pynshong nongrim kat kum ki jingbthah, ka bor District kala leh ïa kata. Namar kata, ka NPP ne mano mano ruh kim lah ban ong eiei. Ban shu kynnoh ïa ka NPP bad ka kyrteng jong nga ka dei kaba bakla palat. Wat nga ruh nga khlem ïoh ban pynlong ïa bun tylli ki rally jong nga” ong u Conrad hynne ka sngi nyngkong.
U Conrad ula ong ba kum kine ki kam ki ju jia ha ka por elekshon hynrei ka BJP kala shu pynheh ïa kane ka ishu. “Nga la dep ong naduh kaba sdang ba ka stadium ka don arbynta. Ka bynta ba nyngkong ka kynthup ïa ka football stadium kaba la dep ban plie.Kawei pat, ka dei ka Indoor Stadium bad ka Swimming Pool, ka bym pat dep bad ngi la dep kren shai ïa kane. Ka kam ka dang dep tang shiteng bad kawei pat ka bynta kam pat dep satia” ong u Myntri Rangbah.
Lah ban kdew hangne ba ka Sorkar Jylla hapoh ka jingïalam jong u Conrad K Sangma, kala plie paidbah ïa ka Football Stadium ha ka PA Sangma Sports Complex, Tura, West Garo Hills ha ka 16 tarik Nohprah 2022. Kane ka madan ïalehkai ka dei ka madan ba nyngkong eh ha Jylla kaba long kat kum ka International standard.
Halor ki daw kiba lah ban long halor ka jingbym ïoh jingbit ban pynlong rally, u Conrad ula ong “Ka dei ka jingshisha ba haba u PM Modi u pynlong ïa ki prokram, ki paidbah kin wan bun bha. Namar kata, nga sngew ba ki bor District ki lah ban sngew ba ka dei ka natural turf (phlang shisha), bad lada wan bun ki briew, ka lah ban pynjulor ïa u phlang bad kawei ruh ba kam don satia ka jaka pynïeng kali”.
