Ka Pule puthi, ka koit ka khiah,ka rep ka riang bad tohkit ïa ka bamsap, ki kular elekshon ka VPP

Shillong, Rymphang 20: Ka Voice of the People Party (VPP) ha ka sngi Nyngkong ka la pynlait paidbah ïa 34 tylli ki mat jingkular (Manifesto) jong ka party sha ki paidbah ka jylla ba kum ka party ka don ban kular na bynta ka ilekshon 2023 ka ban long haka 27 tarik mynta u bnai.
Haba pyllait ïa kane ka kular jong ka VPP u President ka party u Bah Ardent Miller Basaiawmoit u la pyntip ba ki don haduh 34 tylli ki mat bad kiba hakhmat eh kiba kum ka party ka buh thong ban pyndep na bynta ki paidbah lada ki pynjop ïa ka VPP ha kane ka elekshon. Ki mat jingkular ka VPP ki kynthup ban kyntiew ïa ka pule puthi, ka koit ka khiah, ka rep ka riang, ban ïada ïa ka khyndew ka shyiap, ban wad ki lad ki lynti ban pynduna ka jingkynriah ki nongkyndong sha jaka sor, ban pynkylluid ïa ka nongbah Shillong da kaba pynmih ïa ki sor rit thymmai, ban kyntiew ïa ka kam jngohkai pyrthei, ban pynbiang bording, ka ïoh kam ïoh jam, ban bishar biang ïa ka MoU pynbeit pud, ban pynkhuid ïa ka thung kam thung jam, ban ïada ïa ka mariang, ban tehlakam ïa u drok bad kiwei kiwei de.
Haba kren sha ki lad pathai khubor hadien ba la dep ban pynlait ïa ka kular eleskhon jong ka party u Bah Ardent u la ong ba ka jingdonkam ki paidbah ka jylla la buh ha khmat eh bad ka phlang shai kdar ruh ba ki kular ka party ka dei na bynta u paidbah bad ka jylla hi baroh kawei.
U la ong ruh ba kum ka party ka kular ba ka jingïasoi ka sorkar Meghalaya bad Assam ïa ka MoU halor u pud u sam ka party kan peit biang bad ong ba ka jingpynbeit pud kan dei ban long kat kum ka history jong ka jinglong trai ïa ki jaka puta.
Ka VPP ka kular ruh ba ka party kan pynthikna ba ka jingregistration ïa ki jaka puta ha ki jaka khappud kan long kaba ym dokam siew eiei.
U la ongr ruh ba ka party ka ïohi ba ka long ka jingdonkam kaba khraw ban theh ïa ki kam pynroi ha ki jaka kahppud ka jylla bad ka Assam.
Ka VPP ka kular ruh ba kan thung da ka kynhun tohkit halor ki kam bamsap bad ki kam be-aiñ kiba la jia ha kane ka jingsynshar kane ka sorkar kaba synshar ha kane ka kynti. Ka VPP ka kular ban tohkit halor ka jingpynlut ha ka jingïakhun ïa ka khlam Covid-19, ka jingbamsap ha ka Saubhagya, ka bamsap ha ka jingpyntrei ïa ka JJM, ka jingkhyllem u tnum pyllun ka Assembly, ka kam khañi bad tih be-aiñ ïa u dewiong, ka jingshah siat teargas ïa ki nonghikai bad kumjuh ka jingleit siat ïap ïa u Bah Cheristerfied Thangkhiew ha ka ïingsah jong u.
U la ong ruh ba ka party kan bud dien ïa ka jingdawa ban pyntreikam ïa ka Inner Line Permit (ILP) kaba ki paidbah ki la angnud la slem bha.
“ Ka jingbym ïoh ka jylla ïa ka ILP kadei hi namar ka jingbym shim khia ka sorkar jylla ban pynbor ïa ka sorkar pdeng halor kane ka mat bad ka jingmynjur ïa ka resolution ruh ka dei ka kam tang ban dep rukom bad ban pynthada ïa ka jingïakhih ki seng bhalang,” ong u Bah Ardent.
U Bah Ardent ula ong ba ka shong sa ha ki paidbah ban buh jingkylli ïa ka sorkar jylla, la ka mut shisha ne em ban pyntreikam ILP hapoh Meghalaya bad ka shong hi ha ki paidbah ban ai jingsneng ïa ka sorkar bad ïa kino kino ki Party kiba ïalehkai ïa kane ka mat kaba ki paidbah ki la angnud mynta la bun bun snem.
Ula bynrap ba ha ka jingshisha kam donkam ïa ka ïing dorbar ban rah syndon da ka Resolution na ka bynta ban pyntreikam ïa ka ILP hynrei kadei ban ïakhun tyngeh pyrshah ïa ka sorkar pdeng ban weng noh ïa ka hukum u President kaba la weng noh ïa ka kyntien Khasi-Jaiñtis na ka Preamble jong ka Bengal Eastern Frontier Regulation Act 1872.
Haba ïadei bad ka jingpyntreikam ïa ka Meghalaya Residents Safety and Security Act (MRSSA), u Bah Ardent u la kam ba kino kino ki sorkar kim lah ban tehlakam ïa ka jingwan rungkyrthlep ki bar ri tang da kawei ka aiñ hynrei donkam ban pyntreikam ruh da kiwei ki aiñ kiba ïahap bad ka juk mynta halor kane.
Nalor kane u President ka VPP u Bah Ardent ula pynrem ruh ïa kiwei ki sengsaiñ pyrthei kiba khlem kynthup ïa ka ILP hapoh ki Manifesto da ka ba ong ba kane ka paw shai ba kim don shisha ka jingkitkhlieh ban pyntreikam ïa ka ILP.
Shuh shuh na ka liang ka party ka kular ba lada ki paidbah ki pynjop ïa ka party ba kan don ha ka sorkar ban ïai buddien biang ïa ka jingdawa ban kynthup ïa ka jylla hapoh ki jylli treikam ka Article 371 jong ka riti synshar.
“Lada phi kynmaw mynba nga rah ïa kane ka mat ki MLA ha kato ka por kim shym la kyntait ba kam donkam hynrei ki MLA ki pan por namar ka dei ka mat kaba donkam ban da pyrkhat sani bad nga ngeit ki la don por san snem tam ki la sngewthuh ba kane kan dei ka stieh ïada ïa ka jaidbynriew bad ba kiwei ki party kin mynjur lang bad ngi,” u la ong.
Haba ïadei bad ka ïohkam ïoh jam ka VPP ka kular ban pynkhuid ïa ka rukom thungkam ha ka MPSC bad ban pyndap ïa ka kam ba thylli ha ki tnat sorkar bad kumjuh ruh ban kyrshan ïa ki samla ban seng kam lajong da kaba wad lad ban pynmih ïa ki kynja ram ban kyrshan bai seng ïa ki.
Haba ïadei bad ka pule puthi u la kular ban kyntiew biang ïa ka burom ba la jah ka pule puthi ha ka jylla da kaba pynbha, bad pynim biang ïa ka pule puthi.
Shuh shuh ka VPP ka la kular ban pyndam ïa ka jingsiew da ka sorkar jylla ïa ka khajna (Income Tax) ïa ki shakri sorkar bar jylla.
Haba ïadei bad ka jingshim bynta ki nonghikai ha ka kam synshar khadar na ka liang ka VPP ka kular ban pynshlur ba ki nonghikai kin mih shakmhat bad ban pyndap ruh ïa ki policy kiba ka sorkar ka thaw khang ban pynsaja ïa ki nonghikai kiba kwah ban shim bynta.
Shuh shuh haba ïadei bad ka Reservation Policy, ka VPP ka kular ban peit biang bad pynkylla ruh ïa ka na ka Office Memornadum sha ka aiñ pura.
Ka VPP ka kular ka ban ïai bud dien ruh ïa ka jingpynrung ïa ka ktien Khasi bad Garo ha ka Eighth Schedule ka riti synshar.
Haba kylli haduh katno ka VPP ka don ka jingsngew skhem ban lah ban pynurlong ïa kine ki mat namar ka pynïakhun tang 18 ngut ki kyrtong, u Bah Ardent u la ong, “Lada phi peit ha kane ka sorkar kaba mynta ka party kaba jop tang 8 ngut ki MLA ka lah ban pynurlong ïa kino kino ki mat lada ka kwah ngi ruh ngi sngew skehm ba kan wan biang kane ka sorkar namar phi peit na ka jinglong jingman ka la kdew shai ba kan wan beit hi ka sorkar synrop.”