Shillong, Rymphang 20 : Kum u president jong ka seng United Democratic Party, ka khubor halor ka jingkhlad kyndit jong u bah Horju Donkupar Roy Lyngdoh (Bah Don) ka long shisha ka jingangewsih bad ka jingduh nong kaba khraw ïa ka seng namar ha ka jingwan pynïasoh ka jong u sha ka seng ha ka por kaba lyngkot ka long shisha ka jingai mynsiem ïa baroh namar u long u rangbah uba la san ha ka kam saiñ hima bad uba la ai ïa ka jingshakri ïa ka jaidbynriew ha kiba bun ki liang bad khamtam eh ban shakri kum u nongthawaiñ ha ïingdorbar thawaiñ la bun bun snem bad ruh kum u nongmihkhmat ïa ka Sohïong konstitwensi.
Ïa ka ilekshon 2023, ka UDP ka la i mon ïa u ba un long kyrtong bad ka kwah ruh ba un dang bteng biang ban shakri kum u nongmihkhmat hynrei ka jingshim noh jong U Blei ïa u bah Don ha ka 20 tarik Rymphang, 2023 ka long kaei kaei kaba ngim lah ban buh jingkylli namar ka dei ka mon jong U Blei. Nga kwah ban phah ïa ka khubor sha ki paidbah ka Sohïong konstitwensi bad kumjuh jong ka Jylla ba kim dei ban duh jingkyrmen hynrei ban shaniah ha U Trai kynrad namar kum U Nongthaw U don ïa la ka jong ka jingthmu ïa ka ïing ka sem, ka Sohïong konstitwensi, ïa ka seng UDP bad ïa baroh hi.
“Nga phah ïa ka jingsngewlem sha ka ïing ka sem baroh, ki paidbah ka Sohïong konstitwensi bad ka Jylla ha kum kane ka por bad nga buh ha ki jingduwai ba U Blei Un pyntngen ïa baroh bad to ka met kaba sah jong u Bah Don kan leit da ka jingsuk”.
Kumjuh ruh na ka liang u bah P.T Sawkmie kyrtong ka UDP na Mawlai Constituency kum uwei na ki MLA ba la ju ïatrei lang bad I bah HDR Lyngdoh i la pynpaw ba ka jingkhlad ba kyndit jong i ka long ka jingduh kaba khraw ym tang ïa ka ïing ka sem jongi hynrei ïa ka constituency, ïa ka jylla khamtam ïaka ri bad ka jaidbynriew. Namar u long uwei na ki nongïalam bad rangbah uba ieit ïa ka jaidbynriew bad uba kwah ban pynskhem bad saiñdur shuh shuh ïa ka jinglong tynrai ka jaidbynriew. U long uwei na ki riewsaiñ pyrthei uba la ih bad uba tbit ruh ban treikam khamtam kum u myntri kam pohïing ka jylla.
“ Ngam don kyntien ban batai hynrei tang ki jingduwai ba U Blei un ai ïa ka jaka shongneh kaba junom ïa ka mynsiem jong une u rangbah. Nga phah ruh ïaka khubor sngewlem jong nga sha i kurim, ki khun ki kti bad baroh kiba haïing hasem jongi. Kumjuh ruh nga phah ruh ïaka khubor sngewlem sha ki paid jongka Sohiong Constituency kiba la duh ïa une u nongïalam bad nongmihkhmat ba radbah jongki” pynkut u bah P.T Sawkmie.
