Khlad kyndit u Bah HDR Lyngdoh : ïam briew ki nongkyrshan ka UDP Sohïong Constituency

Shillong, Rymphang, 20: U Bah H. Donkupar Roy Lyngdoh uba long u Myntri barim jong ka Sorkar Jylla bad u kyrtong jong ka United Democratic Party na Sohiong Constituency u la khlad noh ha Bethany Hospital, Shillong ha ka 20 tarik u Rymphang, 2023. U lyoh uba dum u la tap ïa ka UDP bad ïa ka iing sem baroh kawei namarba ka jingpynkhreh ka long sa tang hynñiew sngi shwa ba ka Jylla kan sa leit sha ka elekshon jong ka Iingdorbar Thawaiñ ka Jylla ka ban sa long ha ka 27 tarik, Rymphang.
Katkum ka jingïathuh jong ki bahaing, u Bah HDR Lyngdoh u la khladnoh na ka jingkyndeh shadem ha ka por kumba 6:00 janmiet. La ïathuh ba u Bah HDR Lyngdoh u la ud suh kpoh kynsan katba u dang don ha ka jingïalang kaba la long ha Mawmaram ha ka por kumba 3:00 nohphai sngi. Mar mar, hadien, la pynkit ïa u sha Bethany Hospital ban ïoh ïa ka jingsumar kaba kyrkieh hynrei tang hapoh lai kynta la ïoh pynban ïa ka khubor kaba sngewsih ba u la khladnoh na kane ka sla pyrthei.
Ki bahaïng ki la pyntip ba ka jingleit ontep donburom ïa ka met ba dang sah jong u Bah HDR Lyngdoh kan long ha ka 24 tarik Rymphang ha Shnong Sohïong. Ka jingkhlad kyndit jong u Bah HDR Lyngdoh ka la pynkyndit bad pynpait dohnud ïa ki bahaing hasem, ïa nongkyrshan ki jong u bad khamtam eh ïa ka United Democratic Party baroh kawei.
Ïa ka met ba dang sah jong u, la pynkit noh sha ingsah jong u ha Laitumkhrah, Shillong.U Bah HDR Lyngdoh, uba baroh ki ju khot ieid da u Maheh Don, u la long u Myntri jong ka tnat Kam Pohing hapoh ka Sorkar Meghalaya United Alliance (MUA) ba ïalam da u Dr. Mukul Sangma kum u Myntri Rangbah.
U la jop ïa ka elekshon MLA na Sohiong Consituency ha u snem 1988 na ka tiket jong ka Hill State People’s Democratic Party (HSPD)) haduh u 1998.
Ha ka elekshon jong u snem 1998, u la shah rem noh ha u Bah RA Lyngdoh u kyrtong jong ka United Democratic Party (UDP) hynrei ha u snem 1999 u la shah jied kum u MDC na ka tiket jong ka seng Congress na Sohiong-Nongspung Constituency.Sa shisien pat ha ka elekshon kaba la long ha u snem 2003, u la ïoh biang ïa ka jingjop na Sohiong Constituency na ka tiket jong ka Seng Congress. U la long u MLA jong ka Sohiong haduh u snem 2018.
Ha ka elekshon jong u snem 2018 , u la shah pynliem noh ha u Bah Samlin Malngiang uba long u kyrtong jong ka HSPDP.U Chief electoral Officer (CEO) jong ka Jylla u Bah Frederick Roy Kharkongor u la pyntip ba ka elekshon ha Sohiong Constituency la pynsangeh shwa shipor hadien ka jingkhladnoh jong u Bah HDR Lyngdoh bad ka tnat pynïaid elekshon jong ka jylla kan sa pyntip biang da kawei pat ka tarik na ka bynta ban pynlong ïa ka elekshon tang ha Sohiong Constituency.