Shillong, Rymphang 7: U MLA bad u kyrtong ka National People’s Party (NPP) na Mawryngkneng, u Bah Pyniaid Sing Syiem u la ong ba ha kane ka election ka don ka dak kaba phylla na ka jingmih shakhmat jong ki samla ban ai ka jingkyrshan ïa ka NPP, bad kane ka pyni ïa ka dak jong ka jingkyrmen ban lah ban poi sha ka thong ka jingjop da ka jingïatylli lang.
U Bah Pyniaid uba dei u MDC ka Sohryngkham u la jop ia ka byelection na Mawryngkneng ha u snem 2021 kum u MLA, bad hynne ka sngi u la leit ban thep kyrteng ban ïakhun biang ïa ka election. Ia u Bah Pyniaid la synran lang ruh ha kane ka sngi ba khatduh ban thep kyrteng da ki hajar ngut ki paidbah nongkyrshan.
Haba kren bad ki lad pathai khubor, u la ong ba ha ka shisnem tam ba u la long kum u MLA u la pyrshang ban trei ïa ki kam katba lah, naduh ka jingpynioh ïa ka um bam um dih, ki lynti ki syngkien kiba donkam ban pynheh bad ban weng ïa ki jingdheng kali ki la pan ïa ki project na ka Sorkar, bad kiwei kiwei ki jingdonkam ba hakhmat khamtam ha ka liang ki lad jingsumar bad ka koit ka khiah.
“Nga sngewsih ban ong ba ki dang bun ki longïing kiba dang ïoh tang T.5-6 hajar shibnai, kane kaba nga lap ha ka shisnem kum u MLA bad donkam mynta ban kyntiew ruh ïa ka ïoh ka kot jong ki paidbah,” u la ong.
U la ong ba ka thong kaba hakhmat eh lada u jop biang kum u MLA ka long ban wanrah ïa ki kam pynroi, ban kyntiew ïa ka ïoh ka kot bad ban plie lad ïa ki samla ha ka ïoh kam ïoh jam.“Kum u MLA ka Mawryngkneng ka long ba ngan lah ban nohsynniang ha kaba wanrah ïa ki policy kiba biang ha assembly, kum kino ki policy kiba biang ba ïahap bad ki samla mynta ngin ai jingmut sha ka Sorkar, namar kiba bun ki samla kiba shong khlem kam mynta,” la ong u bah Pyniaid.
Ha kaba ïadei bad ka jingshah kynthoh ka seng NPP, u Bah Pyniaid u la ong ba ka NPP ka don la ka jong ka nongrim treikam, bad lehse yn nym lah ban biang kum ka party bad kiwei ki political party ruh kim biang lut. “Ban kynthoh ïa kiwei kaba eh ïalade ruh ngi dang duna, ban lait na kita ki jingïakynthoh markylliang, nga sngew ba ngin ïaphai sha la ka constituency kaei kaba ki paidbah ki donkam shwa,” la ong u bah Pyniaid da kaba bynrap ba na ka liang jong u um don daw ïa kiwei bad um don eiei ban ong ïa ki namar baroh ki dei ki paralok.
