ïaleh khun jakai ka Sorkar MDA halor u pud u sam : kynnoh u Dr. Mukul

By Mawphor News Desk On Feb 9, 2023

Opposition leader Dr Mukul Sangma speaking during the unveiling the portrait of (L) Dr Donkupar Roy at Meghalaya Legislative Assembly on Thursday. (Photo by Sanjib Bhattacharjee).

Shillong, Rymphang 08: U Nongïalam ka Liang Pyrshah u Dr Mukul Sangma ha ka sngi Ba-ar u la ong ba ka sorkar MDA ka la leh khun ja kai ïa ka kam pud kam sam ka jylla kaba dei ha ka jingshisha ka mat kaba kongsan eh jong ka jylla namar ka kdew shai ïa ka jinglong trai jong ngi ïa ka khyndew ka shyiap.
Haba kren sha ki paidbah kiba wan synrah sha ka jingthep kyrteng jong u kum u kyrtong ka party na Tikrikilla Constituency, u la ong ba ki kam bad ki jingtrei jong ka sorkar MDA ki pyni shai ba ka dei tang ka sorkar bula jongno re.
“Haba ïadei bad ka rai kaba ka sorkar MDA ka la shim kaba long pyrshah ïa ka mon u paidbah bad ki trai jaka haba ïadei bad ka jingpynbeit pud bad ka Assam. Ngi lah ban ïohi ki rai kiba kane ka sorkar ka la shim ka dei beit kaba ka sorkar Assam ka la pynkhreh lupa bad kane ka sorkar pat ka shu kongnuh beit kumba ka sorkar Assam ka la bthah. Balei u Myntri Rangbah u pdiang ïa ka jingbthah ka Assam haba ka long pyrshah ïa ka mon u paidbah ka jylla da kaba shu ong beit hooid katba la btah? Ha ngi te kaei kaba u paidbah um pdiang ngi ruh da leilei ngim pdiang katba ha kane ka sorkar pat ka leh khun jakai da kaba pynshad shrieh ïa u paidbah ban pynsngewbha ïa ka Assam,” u la ong.
U la ong ruh ba kane ka sorkar ka kwah ban pynlong pynban ïa ka jylla kum kata ka ktem ki kam khalai kaba long pyrshah ïa ka mon u paidbah bad ka rukom im jong ngi.
Shuh shuh u la ong ba kum ka jylla ngi dei ban don ka jingpyrkhat ba sngew shipara bad ki para nongshong shnong wat ki dei na kawei pat ka jaidbynriew namar dei tang kane ka lynti kaban ïalam sha ka roi ka kiew ka jylla.