Shillong, Rymphang, 08: U MLA barim ka Phulbari Constituency u Esmatur SG Mominin ha ka sngi Balang u la pynrem jur ïa ka jingjia ha ka shnong Charbatapara pyrshah ïa ki nongkyrshan ka NPP ba la ïalam da u MDC jong ka Shyamnagar da kaba kynthoh ba “ka dei ka kam riewkhlaw.”
“Nga pynrem jur ïa ka jingthombor da ki nongkyrshan ka NPP. Nga la ïoh jingtip ba dei u MDC ka Shyamnagar uba la lamkhmat ïa kane ka jingjia bad ka dei ka kam runar. Nga kyrpad ïa ka ECI ban thung ïa ka jingtohkit khnang ba ki jingshisha kin paw pyrthei bad ban sei madan ruh ïa kaei kaba la jia. Kane ka long ka jingjia kaba la pynkyndit bad ka kam kaba khia. Nga kyrmen ba ki bor bahalor kin shimkhia ïa kane ka khnang ban pynlong ïa ka elekshon kaba khuid ba suba,” ong u Mominin ha u kyrwoh.
U Mominic u la ong ba ka NPP ka shrai bad bitar ïa ka jingai jingkyrshan bad ka jingshahniah jong ki paidbah ïa ka Meghalaya TMC.
Haba ïathuh ïa ka jingjia ha ka miet sngi Baar, une u nongïalam ka TMC u la ong, “ha ka proseshon jong ki nongkyrshan ka NPP ki la ther da ki maw, ki mawit bad ki la thombor ruh ïa ka ing ha kaba nga la pynlong ïa ka jingïalang. San ngut na ki nongkyrshan ka party ki la mynsaw, katba ïa uwei na ki, u Nozrul Hoque la pynkit noh sha ka jaka ai jingsumar sha Goalpara hadien ba la pynkynriah na Phulbari Hospital namarba u la kham shitom jur na ka jingshah thombor. Ki Pulit ki la sakhi ruh kumno ki nongkyrshan ka NPP ki la pynjulor ïa ka phyllaw bad leh ïa ki kam kiba la pynshong syier.”
Da kaba kynthoh ïa ka NPP kaba la pynphriang ïa ki khubor lamler, u Mominin u la ong ba kine ki jingkynnoh ki dei ki bym don nongrim haei haei ruh em.
“Nga la ïoh jingtip na ki lad pathai khubor ba ki nongkyrshan ka TMC ki la shah thombor ha ki nongkyrshan ka NPP. Ki jingkynnoh pyrshah ïa ki nongkyrshan ka TMC ki dei kiba bakla, ki bym don nongrim bad kiba lamler. Da ki hajar ngut ki briew ki la sakhi ïa ka jinglong amriang jong ki nongkyrshan ka NPP,” u la ong.
Une u kyrtong ka Meghalaya TMC u la ai khublei ïa ki nongkyrshan ka Party kiba ïaishah wat hapdeng ka jingshah thombor. U la ong ruh ba kum kine ki jingshah thombor kin ym lah satia ban pynsangeh ïa ka jingai jingshakri jong ka Meghalaya TMC sha ki paidbah.
