Shillong, Rymphang 08: Ka jingdheng kali ha Nongbah Shillong bad ki markhap jong ka ka la bteng wat haduh ka sngi Balang shisngi hadien ba la kut ka jingthep kyrteng ki kyrtong ban ïakhun ilekshon kaba la wanrah ka jingdheng kali kaba jur na ka daw ka jingpynmih paidbah ïa ki nongkyrshan.
Kane ka jingdheng kali khamtam eh ha ki bynta ka Upper Shillong shaduh Umshyrpi ka dei na ka daw ba ka tnat Public Health Engineering (PHE) ka tih ïa ka surok ban ïoh thep ïa ki pipe um Ductile Iron (DI) ha shi lynter ka surokbah National Highway 40 ha kitei ki thain.
La sakhi ba kane ka jingpyntrei ban thep ïa ki Pipe um daka tnat PHE ka la sdang naduh ka janmiet jong ka 7 tarik mynta u bnai bad kane ka la ktah jur ïa ka leit ka wan ki paidbah kiba pyndonkam ïa kane ka surokbah National Highway 40 ha ki thain 7 Mer Upper Shillong.
