Ka dur khmat ki samla pule ba nga hikai kam ju i phngaiñ namar ka lawei ba dum ka ap ïa ki: Brighstarwell

Namar ngi sngew kit ram ia ka lawei ba ngi seng ia ka VPP

0

Shillong, Rymphang 08: U Kyrtong ka Voice of the People Party (VPP) na Mawlai Constituency uba long ruh u nonghikai ha St Anthony’s College Shillong u Bah Brighstarwell Marbaniang u la ong ba ka jingkynrum kynram ka synshar khadar bad ka jingbym don ki policy kiba ai jingshngaiñ ïa ka lawei ki samla ka la ktah wat ïa ka rukom pyrkhat bad ka dur khmat ki samla pule Khasi, ha kaba um ju ïohi ba kin don ka durkhmat ba i phngaiñ kumba long lem kiwei pat ki samla pule na kawei pat ka jylla.
Haba kren ha ka jingïalang pynshai paidbah ha Mawlai Mawdatbaki Pata ïa ki nongrim jong ka VPP bad ïa ki daw kiba la pynlong ïa u ban mih sha khmat ban aireng ïa kane ka elekshon, u la ong ba ka daw kaba kongsan eh ka dei namar u ïohi ba ka jingtreikam ba khlem don thong ka sorkar kaba wanrah pat ïa ka jingduh jingkyrmen ïa ki samla pule namar kim ïohi ban don ka lawei kaba shngaiñ ïa ki.
“Kum u nonghikai la jan 10 snem ba nga hikai ïa ki samla ha kolej nga ïohi ba ki samla na ka jylla jong ngi ki lip rong bha ban nujor bad kiwei pat ki samla na kiwei ki jylla bad lada nga kren bad sngewthuh ïa ka daw nga lap ba ka dei ka jingduh jingkyrmen ïa ka lawei la ha kaba dei bad ka jingpule ba sha khmat ne ka kam ka jam ruh, nga la peit shin bha kim ju i phngaiñ ka durkhmat kum kiwei pat kiba pule lang,” u la ong.
Shuh shuh u la ong ba ka jingbym don ki skulbah bad ka rukom thungkam kaba shai ha ki tnat sorkar ki samla ki la ïohi lupa ïa ka jingiduh jingkyrmen.
“Lymda dei ba ngi sngew kit ram ïa ka pateng ban dang wan bad ki khun ki kti jong ngi ngan ym jin la mih shakhmat ban ïatynrong lang bad nagn shu long lang kum uwei na ki nongkhñium ïa ka saw ka sian kaba la ap lupa ïa ngi bad ïa ki pateng bad wad, dei ba ngim kwah ba kane ka saw ka sian kan wan jia ngi la mih ban pynkha ïa ka VPP ban leit sha u paidbah ban pynsngewthuh ïa ka jingdonkam ka synshar ba khuid bad ka synshar kaba don jingkit khlieh,” u la ong.
“Namakata, ngi dei ban sngewthuh ba ka jingïakhun jong ngi kam dei na bynta kane ka elekshon 2023 hynrei na bynta ki khun jong ngi bad ka lawei jong ki bad ngi dei ba sngewthuh ba lada jop ma ngi kamut ka lawei jong ki ngi la jop,” u la jop.
Shuh shuh na ka liang jong u u la khot ïa ki longkmie long kpa ban snoh kti lang ha kane ka jingïakhun da kaba pyndonkam hok ïa ka shi vote ban jied da ka jingstad bad ka jingshemphang ym da ka jingsngew ne da kaba pynshong nongrim ha ki lut tyngka.
“Nga kyntu ba ha ka 26 tarik shuwa ba phin thiah peit ïa i khun ba dang rit ne ki pyrsa ne ki khun ksiew bad pynshong nongrim ïano phin vote da kaba buh hakhmat ïa ki bad sa leit ban thep ïa ka vote na bynta jong ki,” u la kyntu.

Leave A Reply

Your email address will not be published.