Shillong, Jylliew 30: Kum ka jingthmu ban ai ka jingïada ïa ki nongwan jngohkai, ki bor pynïaid ka Tourism ki la pynlong kongsan na ka bynta kiba wan jngohkai ba kin wai ïa ki guide haba ki leit sha ki kam kiba dei shabar bad kiba hab hapoh ka East Khasi Hills district.
Kane ka hukum ka la wan shi bnai hadien jong ka jingbym khmih lynti ïa u nongwan jngohkai na Indore – u Raja Raghuvanshi – u la shah pynïap ha la ka jong ka kurim bad ki lai ngut ha ka jaka pynïeng kali kaba hajan Weisawadong Sohra jong ka district ha ka 23 tarik u Jymmang.
Na ka liang ka Deputy Commissioner ka East Khasi Hills ka Kong Rosetta M Kurbah ka la pynmih ïa ka hukum kaba ong, “Kum ka daw ban ai ki jingïada, mynta ka long kaba kongsan na ka bynta baroh ki tourist ban shim ka jingai jingshakri lyngba ki tourist guide ba la ithuh haba ki leit trekking haba ki leit shabar jong kane ka thaiñ.”
Ka jingdonkam ban ïalam lang ïa ki guide ym tang ba kan pynthikna ïa ki lad jingïada ba bha na ka bynta kiba wan jngohkai hynrei kan ïarap ruh ban ïada na kino kino ki jingjia kum ki jingjah rngai, kiba mynsaw ne kiba shah ktah ha ki kam runar ha ki jaka ba long marwei, ka la ong.
Ka Kong Kurbah kaba dei ruh ka Chairperson of the District Tourism Promotion Society (DTPS) ka la ong ba ki lad jingïada bad jingsngaiñ ka long kaba kongsan hadien ka jingjia shah pynïap kaba la pynkyndit ïa ka jylla kaba la lam ruh sha ka jingshah kem ki 8 ngut ki briew na Indore.
Ki heh ophisar ka Tourism ki la ong ba ïa kane ka hukum yn pyntreikam pyrkhing bad kiba pynkheiñ kin mad ki jingshah pynshitom ne ki ym shah ban leit sha ki trekking.
Na ka liang ki bor pynïaid district ki la nang pyrkhat ban buh bun ki guide ba la shah hikai bad ban trei lang bad ki nongïalam shnong ban pyntreikam ïa kine ki jingbthah.
U Myntri ka tnat Tourism u Bah Paul Lyngdoh u la ïathuh ba ka jingkiew bad jingwan ïuhkjat ki nongwan jngohkai kan long kumba 2 million ha une u snem bad ka sorkar ka la pynkhreh ïa kiba bun ki prokram kynthup ka Cherry Blossom Festival ha kaba ki artist ba nabar ri kin wan ban pyni ïa ki sap ha kane ka nongbah Shillong.
