Shillong, Rymphang 16 : U National President ka National People’s Party (NPP) bad Myntri Rangbah ka Jylla Conrad K Sangma, ula ïaid ïalap elekshon khlem shongthait ha baroh ki Constituency ka Ri-lum Garo ban nang pynjur ïa ka lyer jong ka NPP ba kan wan biang ha ka bor ban thaw Sorkar ha Jylla.
U Myntri Rangbah ka Jylla ula pyndonkam da ka helicopter ban hiar ha manla ki constituency bad hynne ka sngi palei, ula hiar ïalap elekshon ha lai tylli ki constituency ban pan ïa ka jingïatreilang jong ki paidbah bad ki lai ngut ki kyrtong ka party ha kane ka elekshon MLA ban long la 27 tarik Rymphang.
U Myntri Rangbah ula ïashimbynta ha ka jingïalang paidbah kaba long ha Takimgre kaba hap hapoh ka Rajabala constituency ban pan jingkyrshan na ka bynta u Abdus Saleh, ha Moadamgre kaba hap ha Bajengdoba constituency ban pan jingkyrshan na ka bynta u Pongseng Marak bad ha Bagabatha kaba hap hapoh ka Kharkutta constituency na ka bynta u Rupert Momin.
Ki paidbah nongkyrshan da ki hajar ngut kila wan ïashimbynta ha baroh kine ki jingïalang paidbah ha kaba u Myntri Rangbah Conrad K Sangma ula kren halor ki kam ba ka sorkar ba ïalam da ka NPP kala leh. Ula ong ba ka NPP kala ïeng skhem ha ka nongrim ban trei na ka bynta u paidbah bad kala trei shitom ban pynthikna ba ki kam pynroi ki poi ha manla ki kyndong kynshrot jong ka Jylla.
