20 shah na kaba ha u 2018, kurup pisa, drok bad ki tiar sam ei ban pynbiej elekshon

Shillong, Rymphang 16 : Ka Election Commission of India (ECI) ka la pyntip ba ka jingïoh kurup pisa, droks bad ki mar kiba ki kyrtong ki mut ban sam ei sha ki paidbah nongthep vote khnang ban ïoh khring ïa ka vote jong ki ka la kiew haduh 20 shah ha ka jylla bad ka ECI ka la kam ba dei da ka jingpyrkhing kaba jur ki bor pahara ba la lah ban teh lakam haduh une u pud.
Ka ECI ka pyntip ba naduh ba pynbna ïa ka elekshon kat haduh ka 15 tarik Rymphang ha Meghalaya ka jingïoh kurup ka la kot haduh T.63.98 klur ha kaba 7.36 klur ka dei ka pisa, ka kyiad ba 100299 liter kaba shongdor 2.31 klur , u droks ba shongdor 31.21 klur, ki mar remdor ba shongdor 0.91 klur bad ki mar ba mut sam ei ban khroh vote ba kot 22.19 klur.
Ka ECI ka pyntip ba ka jingïoh kurup baroh ha ka elekshon MLA-2018 ha Jylla ka kot tang 1.15 klur.
Lah ban kdew hangne ba ka ECI ka la buh haduh 21 ngut ha Meghalaya ki Expenditure Observers nalor nangta sa ar ngut ki Special Expenditure Observer ban peit ngor halor ka jingpynlut pynsep ki party bad ki kyrtong ha kane ka elekshon..