Ka jingnoh shiliang khmat sha kiba ha ïing bad ka bamsap ha ka jylla pynkut noh da kaba pynjop ïa ka BJP: Sonowal

Shillong, Rymphang 16: U Myntri ka sorkar pdeng uba peit ïa ka tnat Ports, Shipping & Waterways bad Ayush, u Sarbananda Sonowal u la khot la wer ïa ki paidbah ka jylla ban snohkit lang bad ka BJP ha ka jingïakhun ban pyndkhut noh sbak ïa u kynjri ka jingshah shiliang khmat ki paidbah bad ïoh jingmyntoi na ka bhah ki paidbah tang sha kiba ha ïing ki heh ki haiñ bad kumjuh ban pyndkhut noh ïa ki kynjri ka bamsap bam klop kiba la teh mraw ïa ka jylla da kaba ki kyrshan ïa ka BJP kaba don ka thong ban rat dyngkhong ïa kine ban wan bujli da ka suk ka saiñ bad ka roi ka kiew ka jylla.
Haba kren ha ka jingïalang paidbah jong ka party ha Tikrikilla u Sarbananda Sonowal u la ong, “Ki paidbah nongshong shnong ka Meghalaya ki la shah patar lyngkot lyngkhai na ka roi ka par ha ki artylli ki ksuid ba shyrkhei kata, ka jingshah peit shiliang khmat u paidbah da kaba pynleit jingmut tang na bynta ka bit ka biang ki ba ha ïing lajong bad ka bamsap ka shyrkhei yn lah ban pynkut noh tang da kaba phi kyrshan lang ïa u Modi ban pynurlong ruh ïa kaba u angnud da kaba pynjop ïa ka BJP. Phi la sakhi ba ka NPP bad ka Congress ki la synshar ha ka jylla bad ka jingbamsap ruh kaba da i shyrkhei bad ka jingbuh ha khmat ïa kiba ha ïing ruh kaba la paw shai kdar. Dei tang ka BJP kaba buh ha khmat ïa ka roi ka par, ka jingpynkupbor ïa ki paidbah da ki kshim kiba u Modi u wanrah bad shibun bah ki soh bathiang ba phi dei ban ïoh bam vote ban pynjop ïa ka BJP.”