Nongstoiñ, Rymphang 9: Na ka bynta ban pynkhlaiñ shuh shuh ïa ka party ha kane ka election ban wan ka United Democratic Party Nongstoiñ circle ha kane ka sngi palei ka la pynlong ïa ka jingïalang paitbah ha ka shong Mawduh kaba don ha ki thaiñ Sangriang ha kaba da ki spah ngut ki paitbah na ki san tylli ki polling station ki la ïa poi.
Ha ka jingïalang paitbah kaba la pynlong ha ka madan jong ka shnong Mawduh kaba la pynïaid da u bah Blassing Marngar la ïoh ïa ka jingkren na u bah S.Nongsiej u ba dei u nongïam ba hakhmat duh jong ka HSPDP bad u ba la pynïasoh noh sha ka UDP, u bah Shining Myrthong president ka UDP Nonkhnum area, u bah Aaron Pyngrope, u bah L.G Nongsiej bad khatduh eh la ïoh ïa ka jingkren na u bah Polestar Nongsiej u kyrtong ka UDP jong ka Nongstoiñ constituency.
U bah Nongsiej haba kren ha katei ka jingïalang u la ong ba baroh ki shnong ha katei ka thaiñ ki dei kiba im ha ka rep ka riang bad kiba ieit bha ïa ka mariang. Kumta kum u kyrtong jong ka party lada un poi sha ka thong ha kane ka election, un thaw ki lad ki lynti bad un ïakren bad ka sorkar ba ka dei ban phai khmat kyrpang sha ki nongrep.
Nalor kata u la ong ba lada un jop ha kane ka election ka thong jong u ka long ban ai ka jingshakri kaba paka ïa ki paitbah bad ban wanrah ïa ki jingmyntoi kum ki jaka sumar, ki lad ai kam ai jam ïa ki samla bad ba un ym ñiew shiliang khmat ïano ïano ruh hynrei ïa baroh ki jingïarap ba ka sorkar ka la mang na ka bynta ki shnong ki thaw bad ki paitbah un pynpoi lut.
U bah Nongsiej u la ong ruh ba u don ka jingthrang bad ka jingangnud ban kyntiew ïa ki samla ha ka kam ïalehkai sport, namar ba u tip ba ki samla jong ka West Khasi Hills, ki dei kiba don sap bha ha ki kam ïalehkai khamtam eh ha ka phutbol bad u kwah ba kin long ki khlur ym tang ha ka jylla hynrei shaduh sha bar jylla ruh.
Haba peit ïa ka jingwan jong ki paitbah ha katei ka jingïalang, ym lah ban len ba ka UDP ka la suhthied bha ha katei ka thaiñ bad ka don ka jingkyrmen kaba khraw ha kane ka election ban wan.
