Nongstoiñ, Rymphang 9: Na ka bynta ban pynïaid beit ïaid ryntih ïa ka election ka ban long ha ka 27 tarik mynta u bnai bad ban lait na ki jingklumar, ki nongïalam jong ka Federation of Khasi Jaiñtia & Garo People Rambrai circle mynta ka sngi lyngba ki lad pathaikhubor ki la kyntu ïa ki paitbah ba ha kane ka election ka ban sa long shen ki paitbah ki dei ban pyrkhat sani bad puson ba shuwa ba kin leit thep ïa ka vote jong bad haba ki leit thep vote kim dei ban pyrkhat ba kin ïoh ei ei na ki kyrtong.
Nalor kata ki la kyntu ruh ba ki paitbah ki dei ban shim ba ka shivote ka jong ki ka dei kaba kordor bad kim dei ban shah pynbiej ha ki tyngka pliah jongno re jongno la ki dei ki kyrtong n eki dei ki nongtrei jong kano kano ka seng saiñpyrthei namar lada ki bakla ka jingduh nong kan long ka jong ka constituency bad jong ka jylla hi baroh kawei.
U bah Shanbor Nongphud general secretary ka seng haba kren ha ki ladpathaikhubor u la ong ba ha kine ki sngi ki la ïoh jingtip ba ki don ki kyrtong kiba la thong da ka pisa ïa ki nongthep vote bad ki pynbiej ruh da ki bun jait ki jingkular kumta u la ong ban a ka liang ka seng kan ym pdiang da lei lei ïa kaba kum katei ka jingleh.
Utei u nongïalam ka seng u la ong ruh ba ki paitbah ki dei ban da bishar bha ïa uba kum uno u kyrtong uba ki ibit ban jied kum u nongmiohkhmat jong ki namar lada ki shu jied khglem da bishar bha kan wanrah ïa ka jingduh nong kaba khraw ïa ka constituency khamtam eh ka Rambrai Jyrngam ka dei ka contituenncy kaba dang sahdien bha kumta ki don kam ïa u nongmihkhmatuba trei shitom bad uba don ka jingkiitkhlieh na ka bynta u paitbah ka constituency bad ka jylla hi baroh kawei.
