Pra phum ka BJP Nongstoiñ bym ïa sngewthuh jingmut ki nongïalam

0

Nongstoiñ, Rymphang 9: Naduh u snem ba la dep ki nongïalam jong ka Bharatya Janata Party Nongstoiñ Mandal, ka la sdang ban ïapyrkhat na ka bynta ban pynïeng kyrtong ha kane ka election ka ban sa long ha ka 27 tarik mynta u bnai bad ka la shong jingïalang la palat sanphewsien ong u bah Dimandar Lyngdoh uwei na ki nongïalam jong k party.
U bah Lyngdoh ha u kyrwoh ba u la phah mynta ka sngi u la ong ba ha kitei ki jingïashong pyrkhat, ki nongïalam ba hakhmat duh ki la ai bor ha u ba un leit sha man la ki shnong ban thaw ïa ki polling booth committee bad lada u la lah ban thaw kumba arphew san tylli ki polling booth committee, yn pynïoh ha u ïa ka tiket ban ïa aireng ha kane ke Election MLA kaba mynta na ka Nongstoiñ Constituency.
Nalor kata ha katei ka jingthoh u bah Lyngdoh u la ong ruh ba u la dep thaw haduh 32 tylli ki polling booth committee ha baroh kawei ka constituency, ha kaba ki nongkitkam bad ki dkhot ki la biang pura ban trei kam ha man la ki jaka ba ki don.
Nalor kata u la kynthoh ruh ba dei hadien ba ka party ka la sdang suhthied bha, u bah Mathew Nongrem president ka BJP Nongstoiñ u la leit ban khroh ïa u bah Diostar Jyndiang MLA barim bad u la kular ruh ba lada un wan rung sha ka BJP un ïoh ïa ka tiket da kaba suk. U la ong ba u bah Jyndiang kum u MLA barim u la kular ba un wan rung noh sha ka party bad un wanrah san hajar ngut ki nongkyrshan.
U bah Lyngdoh u la kynthoh ruh ba kitei ki ar ngut kata u bah Mathew Nongrem bad u bah Diostar Jyndiang ki la ïakut ban ïa ki nongkitkam bad ki dkhot na kitei ki 32 tylli ki polling booth kiba u bah Dimandar u la thung, kin weng noh bad kin thung noh da ki briew jong u bah Jyndiang bad mat shu tip ïa kata, baroh ki nongkitkam bad ki dkhot na kitei ki 32 tylli ki polling booth committee ki la rai ban mih noh bad mynta ki la ïa pra la ka jong ka jong bad ka party ruh ka la pra syndon phum.

Leave A Reply

Your email address will not be published.