Ki kyrtong baroh ki ba don jingthmu na bynta ban ïa khun ïa ka election MLA 2023 ki la ïa pynkhreh shaid shaid ïalade mynta ban tyrwa sha u Paidbah jong ki constituency ha ka Ri Khasi Jaintia bad ban pyni ïa la ki sap ki phong kum ki kyrtong da ka jingkren jong ki, nangta da ka sap trei jong ki bad ruh da ka jingshit rhem bad ka jingkit khlieh ïa ka imlang sahlang bad don ruh kiba pynpaw da ka sap jingai sngewbha bad kiwei kiwei.
Mynta ki por ngi ioh sngew ïa baroh baroh ba ki ïa bein ïa ki politishan naduh ki nongtrei sorkar, ki nong seng kam lajong, ki nongïalam ha la ha la ki jingtrei kam jong ki. Kane ka rukom ïa bein ïa khoh ïa ki politishan ka don ha ki thied snam jong ngi, ym tip balei? Ha shwa ka elekshon baroh baroh ngi i shongshit, ngi pynksan ïa uwei bad ngi pynrem ïa u/ka ba ngim i sngew bang. Ngi kynnoh ïa ka jingshem lanot baroh kum ka jylla ba ka ïa kynduh ka dei na ka daw ki politishan.
Ngi ïa pyrta shla ïa ka jingkylla na baroh ki liang, ki paidbah ne ki Seng Bhalang ne ki riew shmet. Hynrei haba ka don pat kano kano ka polisi thymmai ban pynkylla, ma ngi hi ki paidbah ngi ran dien bad mih ki kynhun ki ban ïa pyrshah met bad mynsiem. Ngi kwah jing kylla hynrei haba ka wan ngi tieng bad ngi kren ruma rutit khlem da pynshong nongrim. Bad ïa bun ki jingpyrshang ban pynkylla ha ki kam pynroi la shu sahkut tang namar ki jingtieng, kiba hateng hateng kiba ym don nongrim. Kine ki jingtieng ki synshar ïa ka pyrkhat pyrdain jong ngi haduh ba ngim ju lah ban shim rai, ym phylla ba ka rukom im jong ngi kam kiew stet, ka suki palat.
Na bynta kano kano ka jingkylla kaba neh ha ka Ri, ngi kum ki paidbah ngi don kam ban pynkylla shwa ïa ka Pyrkhat Pyrdain, ka jinglong, ka rukom pyrkhat bad ha ki jingbat jong ngi ïa kino kino ki jinghikai kiba lah ban ym ïahap dur shuh bad kane ka juk ne ban pynskhem ïa ki jinghikai babha.
Ki politishan kiba ngi ngi jied na ka por sha ka por bad ki ba ngi ngi beiñ ngi khoh, ki dei pynban kita ki ïit kiba pynphalang pat ïa ka jinglong jong ngi ki paidbah. Na ka por sha ka por ngi ioh sngew ba ngi jied tang u ba heh spah bad bym tip shaphang ka kamram kum u nongthaw aiñ. Kane ruh ka pyni ïa ka jinglong jongngi hi. Ngi ong ba ki bamsap – kane ruh ka paw ïa ka jinglong jongngi hi. Ngi kynnoh ba ki peit bad leh bha tang ïa kiba ïajuh ïajan. Kine baroh ki pyni ïa ka jinglong jong ngi, ki politician kim lah ban jied da lade ïa lade, dei maphi manga kiba jied bad phah ïa ki sha ïing Dorbar. Lada don ki politishan ki ba bamsap -dei u paidbah u ba jied, lada don ki ba hehspah bad rit jabieng – dei u paidbah ba jied. Lada don ki ba ñion bein ïa ki rit ki ria – dei u paidbah u ba jied. Ngim lah ban kynnoh tang ïa ki politishan, ngi ïa shrut bad kawang ktieh na kyndong kyndong, hynrei mar ïa kren pyrshah – ngi burom arsap bad ïaroh arsap, thik kum ki myrsiang patar snieh suri, ngi suh jer markhmat, ngi dung narieh.
Haba ngi angnud ïa ka jing kylla, hooid ngim lah len ba ki politishan ki dei kita ki atiar kiba la pynkupbor ba kin lah ban wanrah ïa ki jing kylla naduh khlieh haduh kjat. La pynkup ïa ka iktiar ha ki da ka mon u paidbah, da ka nia ka jutang, bad da ka jing kyrkhu kyrdoh ba kin trei, kin kit kin bah ïa ka khia ka shon, hynrei ngi kum ki riew shemphang ngin hap ban da khan da kñia, ïano ngin phah sha ka Dorbar U Khun u Hajar na bynta katei ka kam kaba khia.
To ngin ïa pyrkhat ngin ïa puson bad ai ba ngin shim ïa u snem 2023 kum uta u snem ka jing kylla, ba ki paidbah kin phah da ki riew rangbah kiba la ïar ha ka pyrkhat pyrdain bad ka jinglong ba skhem ba kin lah ban kyntiew ïa ka jylla bad ïa ka Ri hi baroh kawei.
Ngin ïa sangeh bad bret noh ïa ki rukom pyrkhat barim ba ki Nongmihkhmat ne Nongsthaw ain kin long tang ki ATM u kup shiliang, ne tang ki nongai bai dawai khun, nong sam khiew sam shatri ne nongsam jersey football ïa ki club, ne ki kongsan ba shu paw khubor khlem shongnia. Ai kane ka elekshon ban wan kan long ka jingsdang jong ka jing kylla ha ka rukom jied Nongthaw-aiñ, ba ngin ïa khlad lok noh bad ki bymler kam, bad ailad noh pat da ki nongmihkhmat kiba da don shisha ka maiñ, kiba shemphang bad kiban wanrah shisha ka jingsngewsarong ïa ka constituency haba ki kren hapoh Iing Dorbar Thawaiñ ka Jylla.
