Mawkyrwat, Rymphang 09: U bah Manstudy Nongrem uba dei kum u General Secretary ba mynta jong ka Bharat Janata Party (BJP) napoh ka Ranikor Constituency mynta ka sngi u kwah ban pynshai ïa ki katto katne ki mat ba kongsan ba kum ki paidbah jong ka Ranikor Constituency ki dei ban tip bad ba kin ai ruh ka jingkyrshan ïa u bah Martin M. Danggo u kyrtong jong ka BJP na ka 35 – Ranikor Constituency ha kane ka MLA Election 2023 ka ban sa long ha ka 27 tarik u Rymphang, 2023.
Haba kren ha ki lad pathai khubor ha ka Press Conference, u bah Manstudy Nongrem u la ïathuh ba ka jingmih jong u Martin M. Danggo ryngkat ka kynhun na ka National People’s Party (NPP) Ranikor Constituency ki don la ki jong ki daw bad ïa kita ki daw ruh ym da kwah than ban pynpaw namar ki bun bad dei na kata ka daw ba kum ki nongkyrshan hapoh ka jingïalam jong u Martin M. Danggo ki la shim ïa ka rai ban mih noh na ka NPP bad leit pynïasoh pat sha ka BJP. Namarkata, kum u nongïalam jong ka BJP ba mynta uba bat ïa ka kam General Secretary, u kwah ban pynshai sha ki paidbah ba u Martin M. Danggo u la shim ïa ka rai ban mih namar ka don ka jingbym suk hapoh ka NPP bad ki la leit noh sha ka BJP bad halor ka jingkynnoh ba u Danggo u ju rung u ju mih na kawei ka party sha kawei pat ka long kumta hi namar lada ym don ka jingïasngewthuh jingmut.
“Ïa kane ka rai ban leit pynïasoh bad ka BJP ym shym la shim rai tang ki nongïalam hynrei da ka jingïamynjurlang jong u paidbah”, ïathuh u bah Manstudy. Kumta u la buh ka jingkyrpad ba ki paidbah kin nym don shuh kano kano ka jingar-tatien, jing’tieng haba u Martin M. Danggo ryngkat ki nongbud ki leit ban pynïasoh bad ka BJP namar kumba ka long ba ki paidbah jong ka Meghalaya hi ne hapoh ka North East ki don ka jing’tieng ïa kane ka party BJP, “kane ka jing’tieng ka dei tang ka jingbym pat sngewthuh ïa ki rukom treikam, ha kaba ka long kumjuh ha ki por ba mynshwa ba dang wan ka Congress Party”, u la ong.
“Balei ki ‘tieng, haba wat hapoh ka sorkar MDA ruh ka BJP, ka UDP, ka HSPDP, ka PDF, ki kyrtong shimet, ki don bynta lang ban thaw ïa ka sorkar hapoh ka jingïalam jong ka NPP lait noh tang ka INC ne Congress”, pynshai shuh shuh u bah Manstudy, kumta ki paidbah ki dei ban shai bad kim dei ban sngewthuh bakla halor kane ka bynta. Namarkata, u la ong ba haba ki jied nongmihkhmat ki dei ban jied ïa u briew ym ïa ka party namar ka party ka dei tang ka uniform.
Ha kajuh ka por, u bah Manstudy Nongrem lyngba kane ka kyrwoh khubor u buh ka jingkyrpad ïa ki paidbah jong ka Ranikor Constituency ba kin ai ïa kata ka jingkyrshan kaba pura na ka bynta u Martin M. Danggo ba un jop ha kane ka MLA Election 2023 khnang ba un lah ban pyndep bad wanrah ïa ka roi ka par hapoh ka Ranikor Constituency bad kumjuh ruh ban pyndep ïa ki kam kiba dang sah kum ka jingpynbit pynbiang na ka bynta ka Ranikor Civil Sub Division.
