Namar ka North East India Infrastructure, pynbeit rukom ïaid kali ha ka 15-16 u Jylliew

Shillong, Jylliew 12: Ki Nongleit nongwan ha Shillong kin mad ïa ka jingpyrrkhing ïaid kali ha ki katto katne ki jaka ha ka 15 bad 16 tarik Jylliew bad ki Pulit ka East Khasi Hills kila pynbeit ïa kiwei ki lynti ïaid (diversion) namar ka jingdon ka North East India Infrastructure Summit & Exhibition 2026 ha LARITI, Mawkasiaing bad SRGT Parking Lot, Polo.
U Superintendent of Police Bah Vivek Syiem ula ong ba kane ka jingialang ba ar sngi kan iohi ïa ka jingwan ïa shim bynta ki Myntri ka Sorkar Pdeng, ki VVIP, ki kynhun ba shah khot sngewbha bad nongpyni nam na kylleng ki Jylla ka thain Shatei Lam Mihngi bad na shabar, ka ban lam sha ka jingiaid bun tylli ki kali haka shisien iaid.
Ban pynbeit ïa ka jingiaid beit ïaid ryntih ki kali, ki Pulit kila bthah ïa ki paidbah ba kin kiar ha kaban pyndonkam ïa ka surok Umsawli-Mawksiang-NEIGRIHMS ha ki kynta ba long ka summit.
“Kito kiba wan na Umsawli, Mawkasiang, NEIGRIHMS bad Nongmensong shaphang ka Polo la kyntu ba kin pyndonkam noh ïa ka surok ba iaid lyngba ka Mawpat-Golflink/ Langkyrding-Pynthorumkhrah ban kiar na ka jingslem” ong u SP ha ka kyrwoh ba pynlait ha ka sngi Thohdieng.
Ha ka 15 tarik Jylliew, yn buh ïa ka ‘No Entry’ ha lad Lumjingshai. Ki kali kiba leit sha Forest Colony lane lad CRPF kin hap ban ïaid lyngba ka Lawmali-Polo bad palat khnang ban pynkylluid ïa ka Polo na ka bynta kiba wan Summit.
Ki Pulit ki khmih lynti ïa ka jingjur ka jingiaid ki kali ha shilynter ka surok Polo-Mawkasiang namar ka jingïaid ki VVIP, bad kyntu ïa ki nongleit nongwan ba kin pynbeit lypa ïa ka leit ka wan jong ki.